Tong ka KHNAM ia ka um na Khlieh Iewduh ban test,ka bit ne em ban dih

Shillong, 1 Rymphang: Ki nongialam jong ka KHNAM Youth Wing mynta ka sngi ki la leit ban tong ia ka um kaba la pynlang ha ka Top um kaba don ha Khlieh Iewduh. Ki don ar tylli ki Top Um kawei ka dei jong ka PHE katba kawei pat ka dei ka jong ka Municipal. Ka KHNAM samla kaba la ialam da u bah Thomas Passah President, ki laleit ban tong ia ka um na baroh ar tylli ki top um bad kila thep ha ki bilot ba la ai na Pasteur Institute, bad ia katei ka um ki la leit ai mynta hi ka sngi sha katei ka Institute ba kan test, la katei ka um ka long ne em kaba bit ban dih.
U bah Passah u la ong ruh ba ia katei ka juh ka um yn phah leit test sa ha kawei pat ka tnad kaba kim kwah ia thuh kyrteng bad kin pyn ianujor ia ka ripod kaba ioh na Pasteur Institute bad ka ripod na kata kawei pat ka tnad test um. Katkum ka jingiathuh u bah Passah u la ong ba katei ka um kaba la pynlang ha Khlieh Iewduh ka dei kaba la sam sha kylleng ki shnong kiba don ha sor Shillong kum sha Laban,Mawkhar, Jaiaw Wahingdoh bad kiwei. Hadien ba la lap ba ka um kaba la sam ia u paidbah na Mawphlang lyngba ka Saw mer shiteng ba kam long kaba bit ban dih, u bah Thomas u la ong ba ka KHNAM kan iaid mynta sa ha kylleng ki jaka ban peit la ki paidbah ki ioh ne em ia ka um kaba bit ban dih ne ioh ka dei pynban kaba don Acid kumba la lap ha kine ki khyndiat sngi ba la dep.
Haba peit ia katei ka jaka pynlang um ha Khlieh Iewduh , utei u nongialam ka KHNAM u la ong ba la i dei ba ka sorkar kan bujli noh da kiwei pat ki top um namarba kaba don mynta kumba ka long hi ka dei ka top um kaba la shna naduh ka por u phareng, kaba la iohi ba ki nar ki la kem sarang lut. Tang mar ia poi ha katei ka jaka ka KHNAM ka la pynpaw ia ka jingsngew lyngngoh ba tang u nongap ha katei ka jaka ruh um don, katba na ka tnad PHE pat ka la kam ba ki jaka pynlang um jong ka ki dei ki jaka ba la pyrkhing bha ban rung ban mih hynrei kumba la lap mynta ym shym don nongap ha katei ka jaka.
Lah ban kdew ba katei ka jaka ka um kaba rung sha ka top ka Municipal ka dei kaba wan na Umjasai katba ha ka top ka PHE pat ka dei kaba wan na Mawphlang. Katkum ka jingong u bah Thomas Passah President ka KHNAM Youth Wing u la ong ba kumba ka long ha ka sien kaba la dep ia ka ripod ka Pasteur Institute ka pynioh tang hadien kumba 5 ne 6 sngi bad mynta ruh hadien ba la ioh ia ka ripod u la ong ba ka KHNAM kan sa pyntip sha u paidbah.