Shillong: U don 2000 trok u dewiong, uba la ioh kurup noh, namar ba la kit beain, ha ki por ba khang dewiong ha ka Jylla. Katei ka dei ka jingtip, ba la ai da ka sorkar Jylla, hynnin ka sngi, sha u nongbishar, uba la thung da ka NGT, na ka bynta ban tohkit halor katei ka jing khaii tuh dewiong.
U Justice BP Katoki, uba dei u lamphang jong katei ka komiti bad uba dei ruh u nongbishar barim jong ka Guwahati High Court, ula kren shai ba ia ki jingpynkhreh halor ka jingtih dewiong, yn nang pynbeit ha ki kyndon bapher nangne shakhmat.
Ha katei ka jingialang, kaba long hynnin ka sngi, la sngewthuh ba ki kompeni dewbilat ki mynjur ban bei pisa na ka bynta ban pynkhuid ia ki wah kiba jaboh, na ka jingtuid jong ka jaboh na kitei ki karkhana dewbilat bad utei u khlieh jong ka komiti, u kwah ruh ban tip ia ki briew kiba shah ktah na ka jingkhang dewiong, ha kaba la sngewthuh ba ka sorkar Jylla, kam pat ai satia ia kitei ki kyrteng, hynrei, ka la shu ai tang ia ki nongdie dukan bad kiwei kiba ioh jingmyntoi malu mala na ka jingkhaii dewiong bad kim dei satia kito kiba im beit ha kaba trei kum ki nong bylla, ki nongtrei ha ki par lane ki trai par dewiong ruh kumjuh.
U Katoki, u iathuh ba ka don ka pisa kaba T.400klur, kaba ka sorkar Jylla, ka lah ban iarap ia kiba mynsaw ne wat kiba iap na ka jing ia kynad, halor ka jingkhang dewiong. Ka thong jong katei ka komiti, ka dei na ka bynta ban pyni sha ki paidbah halor ka jingma jong ka tih dewiong beain ha ka Jylla bad kumta nangne shakhmat, ka don ia katei ka thong ban hikai sha ki paidbah halor kitei ki phang bad kiwei de ki lad ki lynti ban don ka jingtih dewiong kaba iahap katba kum ka juk shai mynta.