Tohkit U IO ka CID, ia u Bah Stanlywiss khlem ai bor ka Kashari

Shillong, 1 Rymphang:
U ophisar ka tnad CID  uba shimti ban tohkit kum u investigation officer (IO)  halor ka jingkynnoh bamsap ia ka jaka ha ri Mawpalai ha Ri-Bhoi da u MLA barim ka Umroi u Bah SW Rymbai u la pynkhein ia ka kyndon da kaba tohkit khlem ka jingai  bor ka Kashari, la ong u nongsaid ain u Bah VGK Kynta.
Haba kren mynta ka sngi sha ki nongthoh khubor u Bah Kynta u la ong ba” u IO ba tohkit ia  u Bah  Rymbai u  PS Paul Choudhury (DSP CID) u la pynkhein ia ka ain khlem ka jingai jingbit ka Kashari”.
“Kane ka long ba u Bah Rymbai um don ha ka police custody. Ka dang don ha ka jingpeit ka Kashari bad ym pat aiti ha ka jingtohkit jong ki pulit”.
U Bah Kynta, uba la leit jngoh ia u Bah Stanlywiss Rymbai, ha hospital, u la ong ba u IO u la tohkit shibun bah ki jingkylli ia u Bah Rymbai.
“U  IO  u la pynktha khlieh ia u Bah Rymbai namar ba u la pynbor ia u ban iathuh ia ka jingdonkti jong ki heh sorkar”, la ong u Bah Kynta bad bynrap ba bun ki sakhi ba u IO u leit ban shim jingtohkit ia u Bah Rymbai.
U la ong ba u la ai jingmut ia kiba haiing jong u MLA barim ba kin ujor pyrshah ia u IO. ”Nga la ong ia ki ban ujor sha ka State Human Rights Commission bad dawa ban siew bailutksan na u IO bad kiba heh jongu”, la ong u Bah Kynta.
U la ong ba ka jingpanbor ban leit jngoh ia u Bah Rymbai la shah da ka Kashari hadien ba la kyrpad ha ka Kashari u District and Session Judge E Kharumnuid  hynnin ka sngi da kaba pyntip ruh ba ka la don ka jingpynkhein ia ka hok briew man briew.
Hadien ba bishar, ka Kashari ka la bthah ia u IO ban shah ia kiba haiing ban iakynduh ia u Bah Rymbai katkum ka kyndon.
Ia u Bah Rymbai la kem ha ka 25 tarik Kyllalyngkot da ki pulit ka CID ha kaba iadei bad ka jingujor pyrshah ia u ha ka 12 tarik Naiwieng, 2012 kaba iadei bad ka jingkynnoh bamsap ia ka khlaw ha shnong Umsawkhwan ha Ri-Bhoi.