Tohkit u DC, bym ioh khaw ha Wahkhen

Shillong, 26 Naitung:
U Deputy Commissioner ka East Khasi Hills u Bah Peter S Dkhar  u la ong ba u la bthah ia ki ophisar na ka tnad Food and Civil Supplies ka district ban pynshisha ban tohkit hadien ba u la ioh shuh shuh ia ka jingud na ki nongbam khaw sorkar ki bym ioh satia ha shnong Wahkhen.
”Nga la bthah ia ki ophisar ban tohkit bniah hadien ba nga la ioh ia ka jingujor sa 28 ngut ha kane ka sngi Thohdieng ki bym ioh thikna ia u khaw reshon ha shnong Wahkhen”, la ong u Bah Dkhar.
U Deputy Commissioner u la ong ba katkum ka jingujor ba u dang ioh ha kane ka sngi Thohdieng, la kynnoh ba u nongbat khaw ka Wahkhen um shym la ai khaw sa ia ki  28 tylli ki longing kane ka shnong.
 ”Ngi hap ban pynshisha ia kane ka jingkynnoh. Ngin phah tohkit da ka magisterial inquiry lada ka jingkynnoh ka long kaba shisha”, la maham u DC.
U la ong ba un pyrshang ban pynbeit ia kane kynrum kynram kloi katba lah. Lah ban kdew ba u DC dang shen u la hukum ba dei ban sam lut ia u khaw reshon sha ki 18 tylli ki longing ha Wahkhen kiba shah pynduh jubor ha kine ki ar snem ba la dep.
Kane ka rai jong u DC ka long hadien ba la lap da ka jingtohkit magisterial inquiry ba la leh da ka  magistrate Kong M. Shira Kshir.