Tohkit ki pulit halor ka kam khaii pisa thok

Shillong, 21 Jylliew:
Ki pulit jong ka tnad Special Cell na Shillong ka la kem saw ngut ki briew na Pillangkata, na khappud ka Meghalaya bad Assam kynthup kawei ka longkmie ha ka 20 tarik mynta u bnai ha ka por lai shiteng janmiet. Kitei ki kynthup ia u Nirbhay Rabha, 30 snem ka rta bad u Samsul Ali, 26 snem ka rta kiba dei na Boko Assam ryngkat ruh u Jefferson Lakiang, 36 snem ka rta bad ka kong Shiela Marbaniang, 58 snem ka rta kiba dei na ka nongbah Shillong.
Ki khubor na ka jingtohkit ki pulit ka long ba ka kong Shiela Marbaniang kan wad ia ki nongthied ia kitei ki pisa thok kata ha kaba long shiteng na ka pisa thok da ka pisa shisha . Ia ka jingthmu ban pyniaid ia ka pisa thok ka long na Ri Bhoi ha ba ki pisa thok la sop da ki kynja dawai (Iodide solution) bad kaba long rong iong ban tap ia kitei ki tyngka thok . Ia kitei ki lut tyngka thok hadien kin sa sait da u dawai ba la tip kum ka Sodium Thiosulphate (Hypo solution) kaba ju pyndonkam khamtam ha ki studio saitdur.
Kane ka long shi bynta ban pynthame ia u nongthied ba katei ka dawai ka lah ban pynkylla ia katei ka kot rong iong sha ka lut tyngka. Ka la don ka jingiakut jong kitei ki nongkhaii bad u wei u nongthied ia katei ka jait dawai ha Guwahati Airport. Shisien ba la siew ia ka pisa na ka bynta katei ka dawai ha u kynja bilor, mano re mano ba don hajan un sa wan ban leh kum ban tynrah da ka bike bad pynpait ia u bilor dawai da ka jingthmu ban pynhoit lut ia ka dawai. Ki nongthied ha kum katei ka khep kim lah ban leh eiei ban dawa ia ka pisa jong ki bad na ka jingphla jong ki la don haduh saw ngut kiba la shah thok kata na Nongstoin, Nongpoh, Tinsukia bad na Arunachal hynrei khlem ioh jingujor eiei ha ki pulit.
Ki tiar ki tar kiba la ioh kurp ki long ka kot (laminated paper) ba jyrngam ha ka yn theh ia ka dawai, ka kynja dawai ba long rong blue jyrngam (Sodium Thiosulphate) ha u bilor , 17 tylli ki song jong ka iodide kaba don 300 tylli kawei ka song 300 ba la sop da ka iodide solution ha ka dur ka lut 500, nagta 12 tylli ki lut 500 ba shisha ba la sop da ka Iodide solution ia kaba la buh hajrong jong kitei ki 17 song , 8 tylli ki mobile phone bad kawei ka kali Mahindra XUV ba iong ba don ia u No. AS-01-BR-0027 kawei ka Wagon R VXI kaba don ia u No. AS-01-BP-8346. Kane ka case la dep kyntiew jingthoh ha Sadar P.S. C/No. 156(6)16 u/s 120B/420/34 IPC.Ka jingtoh kit ki pulit ka dang iaid sha khmat ban ioh kem shuh ia kiwei kiba don kti.