Tohkit ka iingbishar, ba shah khang ka thei khasi ban sem

Shillong:Ka ïingbishar badon burom jong ka Delhi High court, ka la thung ia u nongbishar ba la rangbah, ba la tip kum u V.Giri ban long u nong peit bniah (amiscus curiea) haba iadei bad ka jing peit bniah ban pyntreikam ia ka article ba 15(2) jong ka riti synshar jong ka ri.

U nongbishar V.Giri, un wad bniah ruh lada ka don ne em ka jing ibeiñ, iapher jaitbynriew ha ka imlang sahlang haba iadei bad katei ka mat.
Ka ïingbishar jong ka Delhi High court, ka la hukum ia kane, hadien ka jing shong bishar ia ka jingujor jong kawei ka longkmie khasi na jylla Meghalaya.
Ha ka jingujor ba ka la phah sha ka ïingbishar, ka la iakhun pyrshah ia ka rai jong ka Delhi Golf Club, ban ym shah ia ka ban rung sha katei ka klob namar ba ka phong da ki riam khasi.

Ka kynhun ki nongbishar ba kynthup ia u Chief justice, Satish Chandra Sharma bad u nongbishar Subramanium Prasad, ki la bthah ba ka jing pyniapher haba iadei bad ka jaka kha, kan hap ha ka kyndon aiñ ba 15(2) jong ka riti synshar jong ka ri india.
Ka ïingbishar ka la aipor ruh ia ka Club ba kan phah ia ki jing ioh lum jing tip haba iadei bad ki ain ba thymmai.
Ka jing shongbishar biang kan long ha ka 20 tarik Kyllalyngkot jong u snem 2023.

Ka jing ujor la phah da ka longkmie ba dei ka riewlum (ST) kaba la shah pynduh ban leit sha ka jaka ba ka la shah khot sngewbha ha Delhi Golf club limited, namar ka riam katkum ka riti dustur jong ka.
La ioh jingtip ruh ba ka jing duh jongka ban leit sha katei ka jaka ka dei ka riam tynrai jong ka, kaba long kum ka jaitbynriew Nepali, kaba la pynduh ia ka hok jong ka ban leit sha katei ka jaka.