Tohkit da ka CBI, ia ka MeECL, ong ka BJP

Shillong: Ha ka sng Palei jong ka 8 tarik u Naitung 2021, u President jong ka seng Bharatiya Janata Party(BJP) jong ka Jylla Meghalaya, u Bah Ernest Mawrie u la dawa ba dei ban thung noh da ka kynhun CBI ban tohkit halor ki kynrum kynram kiba la mih ha kaba iadei bad ka jingpyndonkam ia ka pisa kaba 100,49 kur tyngka, katkum ka kaiphod ba la paw ha ka CAG na ka Scheme Suabhagya ne ka skhim ai bording sha ki shnong ki thaw.

Haba kren sha ki lad pathai khubor, u Bah Ernest Mawrie, u la ong ba ha kaba iadei bad kane ka kynrum kynram, na ka liang jong u hi u shaniah tang ia ka CBI ba kan tohkit bniah halor kane namar ba kane ka pisa ka dei kaba la ai na ka Sorkar Pdeng. Shuh shuh u Bah Ernest u la ong ruh ba na ka liang jong ka seng ka sngewsih ban pyntip ba ka la ioh ban pdiang ia ka jubab na ka tnad MEECL ha kaba ki la ong ba kin ai ha ka seng ia ki jingtip kiba kham bniah hynrei tad haduh mynta kine ki sngi ruh ka seng kam pat ioh pdiang satia ia kita ki jingtip ba bniah.

Na ka liang jong ka seng BJP Meghalaya ka la pynkhreh sa ia kawei ka shithi kaba ar kaba dei ha ka dur jong ka RTI bad ban phah pat ia kane ka shithi sha ki bor kiba halor kiba dei khmih lada ka seng kam ioh satia ia ka jubab kaba pan.
Shuh shuh ha kaba iadei bad ka jingdawa ban pynhiar noh ia u James Sangma u ba dei u Myntri ba dei peit ia ka tnad bording, u Bah Ernest u la ong ba ia kata ka bynta hi ka shong ha ka jingstad jong u Myntri Rangbah ka Jylla, u Conrad K Sangma.