Ki pulit ka tnad Criminal Investigation Department (CID) jong ka jylla mynta ka sngi ki la pyn long ia ka jingtohkit ia u Chandra Mohan Jha uba dei u trai jong ka CMJ Univeristy ha ka ophis heh duh, jong ki pulit ka jylla ha Shillong.
U CM Jha u la leit mih hakhmat ki pulit CID ha ka ophis treikam jong ki pulit kaba hajan Secretariat ha ka por 11 baje bad ka jingtohkit ka neh slem bha tad haduh ba u la mih biang lehse ba un leit bamja bad u la wanphai biang ha ka por kumba 3 baje ei ei janmiet ha kane ka jaka tohkit ia u.
La iathuh ba ia u CM Jha la tohkit bniah mynta ka sngi ha katei ka ophis treikam, hynrei ym shym la ioh jingtip satia kaei kaba kitei ki pulit CID ki la kylli na u, hynrei la sngewthuh ba ka jingtohkit hi ka long beit thik halor kane ka kam university.
Ha ka por janmiet pat ki pulit CID ki la ialam noh ia u CM Jha ha Civil Hospital Shillong na ka bynta ban phah eksamin ha ki doktor.
Kane ka jingialam jong ki pulit ia u CM Jha Hospital ka la pynpyrkhat ba lehse u Jha u la shah kem. Na ka liang jong ki pulit ki iathuh ba hadien ba la dep eksamin ia u, yn sa ialam biang sha ka jaka tohkit.
Haba iakren bad u SP Sharma u nongiasaid ain jong u CM Jha u la iathuh ba, um don jingtip la u CM Jha u la shah kem ne kumno namar u don ha Guwahati, hynrei u la kren shai ba u CM Jha un nym shah kem satia namar u la dep ioh jamin lypa.
Na ka liang jong ki nongthoh khubor ha ka jingiakynduh bad u Chief Secretary ka jylla u bah WMS Pariat, u la iathuh ba um shym la ioh jingtip la u CM Jha u la shah kem ne em, hynrei u la ong pat ba lehse yn nym shah kem namar ba u la dep ioh jamin na ka Supreme Court.
U bah Pariat u la ong ba lehse ki pulit ki la ialam ia u sha Hospital ioh ban phah eksamin ioh lehse ba u la ud pang.
U la iathuh ba ka jingtohkit ka dang iaid shaphrang. Haba kylli ka sorkar kan leh kumno halor kane ka University na ka liang jong ubah Pariat u la ong, ai ba ki jingshisha kin paw bad yn sa shim ia karai. U la iathuh ba na ka liang jong ka sorkar kan sa pan jubab na ka CMJ University bad ia ka rai halor kane kan shong eh halor ki jingshisha kiba yn sa lap, u la bynrap.
Phi don ban ong eiei?