Tohkit ba shah pyniap san ngut ki pulit, ong ka CSWO “Uba niah ia ka kali, um dei satia u pulit?”

Shillong, 6 Naiwieng:
Ka CSWO hapoh ka jingialam ka Kong Agnes Kharshiing mynta ka sngi Balang, ka la phah ka dawa ba ka sorkar ka dei ban phah tohkit ia kane ka jingjia shah siat iap san ngut ki pulit ha ki lehnoh ka GNLA hynnin ka sngi.
Katkum ka jingtip jong ka seng, la ong ba u nongniah ia kane ka kali ym dei na ka tnad pulit hynrei u dei na ka tnad pynlip ding bad ka kali kaba la phah kam dei ka Bulet Proof. Ka CSWO ka kynnoh ba kane ka jingjia baroh ka don kaei kaei sha lyndet bad la kynnoh ba ha katei ka por kaba jia ka mobile jong u DC bad SP jong ka South Garo Hills ki khang, la kynnoh kane ka seng ki long kmie ka KSWO. Ka seng ka ong ba kine ki heh pulit ki bun kam ha kaba pynbiang ai jingiada ia ki politician bad ia ki heh sorkar katba ia ki briew kiba don sha ki jaka ba ma kim don por shuh ban peit. La ong ba ha Shillong ba bun briew la pynbiang lut ki lad jingiada ha kaba rah ia ki nongthuh nonglute. Ka long kaei kaei kaba phylla ba ha kane ka jingjia ym shym don ba lait im wat tang u wei na kiba ia leit lang. Ban lap ia ki jingshisha baroh dei ban phah tohkit ha ka rukom kaba dei ia kane ka jingjia la ong ka CSWO. Ki ba shah pyniap hynnin ka sngi dei ki ba la tip kyrteng u Rakki CH Sangma, DFM, Lekikhain Ryngkhlem, Havilder Dondiram Marak, Bipul Rabha bad u Manshanstar Nongdhah. Lai ngut na kitei ki pulit ki dei ki ba naka 3rd Battalion.