“To pynim ialade!”

AIS Suja

“To pynim ialade!”. Ban pynim ia lade, dei ban leh katkum ka ktien u Blei, ym kat kum ka ktien ki briew kein. Ban pynim ialade, donkam ka jingkylla bamut.

Ka jingkylla bamut kam da dei eh ba u briew u la don hapoh Balang, lane da kano kano ka dak kaba shu pynpaw shabar kum ba leh ki Pharisi ki Sadusi, namar ki Pharisi ki ju sngewtynnad ban pynpaw shabar ban iohi briew ba ki long kiba riewhok riewblei, katba ki kam jong ki ka long marpyrshah ia u Blei. “Ki Pharisi, ki ieit ban ieng kyrpad ha ki Synagog, ha ki dong ki lad, ba kin ioh pynpaw ha ki briew. Ong u Jisu – Shisha nga ong ha phi, ki la ioh ia la ka nong”. Mathaios 6:5. Ki long kiba kit niam, leit mane Blei da ka jingarsap.
U Blei um kwah ban iohi ia kaba kum kane ka jingarsap ha u briew kaba leh ei ei tang ban iohi briew hynrei pyrshah pat ia ka mon u Blei. Namar kata, u briew u donkam ka jingkylla bamut ka dohnud ym ha ka met bad ka rmiang shyntur, namar u Blei u bishar ia ka dohnud, “Naba na ka dohnud ki mih ki jingmut bymman” Mathaios 15:19.
Kumta ban pynim ialade ka donkam ia u briew ka jingkylla bamut ka jingphla pop (repentance). Naba haba don ei ei kaba bymman ha ka donud u briew, kata ka dung ngak ia ki haba u Mynsiem Bakhuid u pynkynduh. Dei na kata kajuh ka daw ba ha ka por ba u Petros u ialap ha Judia bad ha Jerusalem, bun ki la iohsngew. “Te haba ki la iohsngew ia kane, la dung ngak ia ki ha la ka dohnud bad ki la ong ha u Petros bad ha ki Apostol – Ah para kumno ngin leh?”
“U Petros u jubab da kaba ong – To phin kylla kaba mut BAD YN PYNBAPTIST IA PHI uwei pa uwei ha ka kyrteng u JISU KHRIST, ia ka ban ioh mab ki pop bad ba phin iohdiang ia ki Jingai u Mynsiem Bakhuid”. Ki kam ki Apostol 2:37-38.
Ka jingphla ia ki jingpalat ha u Blei bad ha ki briew ki jong u Blei ka long ka Hukum u Blei kaba ong – To ia kit phi ia ki jingkit paralok hi, kumta te phin ia pyndep IA KA HUKUIM U KHRIST” Galatia 6:2.
Hadien kane, yn pynbaptist ia uwei pa uwei ha ka kyrteng u Jisu Khrist, ia KA BAN IoH MAB KI POP” ki kam ki Apostol 2:38.
Hadien ba la ioh mab ia ki pop, u Blei un ai ia u Mynsiem Bakhuid kein. Namar u Mynsiem Bakhuid un ym treh ban shong ha kata ka dohnud ba tngit. Donkam ban sar pynkhuid shwa da ka jingkylla bamut bad kaba phla ia ki pop la rit ne khraw, dei hangta – “Phin ioh diang ia ki jingai u Mynsiem Bakhuid” ki kam ki Apostol 2:38.
Kane kam dei ka jinghikai Balang, ne jinghikai pateng la pateng, hynrei ka jinghikai jong ka ktien u Blei kein. Kane ka dei ka jinghikai jong ka ktien u Blei – “Ban pynim ialade, na kane ka pateng bynriew kaba kynriang” ki kam ki Apostol 2:40.
U briew ne ka briew, kiba la phla ia la ki jingpalat ha u Blei bad ioh pynbaptist na ka um bad na u Mynsiem Bakhuid, kine ki pynim kein ialade bad ki lah ban bsut shapoh ka Hima u Blei.
U Jisu u ong – “Shishs shisha nga ong ha me (Nikodimus), lymda kha ia u briew na ka UM bad na u MYNSIEM; um lah ban leit hapoh ka Hima u Blei” Ioanis 3:5. “Lymda kha pat (Born Again) ia u briew, um lah ban iohi ia ka Hima u Blei” Ioanis 3:3.
Kumta, wat pyrshang ban pynim ialade da ka buit bad jingstad briew namar ym don da kawei pat ka lad ka lynti, lait noh katkum KA KTIEN U BLEI.
Ka jingiohmab, ka dei ban long ha ka kyrteng u Jisu Khrist. Ym don mano mano ba lah ban mab lait noh u khun jong u Blei. “Bad ym don ka jingpynim hano hano ha uwei pat (u Blei): Naba ym don da kawei pat ka kyrteng hapoh ka bneng ia kaba la ai hapdeng ki briew da kaba dei ban yn pynim ia ngi” ki kam ki Apostol 4:12. Kumta ban pynim ialade na kane ka pateng bynriew ba kynriang ba mutlop, dei tang da ka kyrteng u Jisu bad ban leh katkum ka jingbthah ka ktien u Blei. Namar ba ha ka kyrteng u Jisu ki khohsiew baroh kin dem khrup, u thylliej baroh un phla, ba u Jisu u dei u Trai. U dei u Trai ha kaba ki briew ki lah ban pynim ialade.
Namar kata, “To kylla kaba bamut, to wan phai khmat ruh ban ioh PYNDAM NOH IA KI POP JONG PHI; ba kumta kin ioh wan ki aiom shong pyngngad na u Trai” ki kam ki Apostol 3:19. “TO PYNIM IA LADE!”. Amen.