To ngin jied MP, da uba nang ban thoh bad kren Hindi

Baroh ki M.P ba ngi la jied baroh shi katta ki la dei tang ki stad kren Phareng suda bad dei na kata ka daw, ba imat katba ngi nang khmih lynti ia ka babha, nang mih pynban ki jingeh na ka por ia ka jaidbynriew ka jong ngi. Naduh ki kam khlaw kan btap, khyndew kam shyiap la ia pynryngkat ia ngi ka Ri Khasi Jaintia bad Ri thor namar ba ki MP jong ngi kim sngewthuh ktien Hindi haba iakren ha Dorbar hapoh Parliament bad kumta ki la shu long Niangkoh nguh bad la shu mynjur bad rah kti khlem tip pat ba ka la long pynban ka jingjot ia ka Ri bad ia ka jaidbynriew ka jong ngi. Teng teng la sngewlehrain ban peit Tv haba ki iatainia hapoh Parliament namar ba ki MP ki jong ngi ki la kylla long pynban kum u thlong. Wow! Ynda ki la wan phai sha Shillong pat ki wan iathuh khyllew ba hana ba nga kren kumta bad ba nga la leh kumta. Une u MP ba mynta, u bah Vincent Pala ruh ngi la jied 2 sien kynthih, hynrei nga nud ban ong ba nga dang lah ban niew katno sien u la paw dur hapoh Dorbar Parliament ha kine ki 10 snem. Ngan nai iakren shuh ia ki kam kiba ktah ia ka jaidbynriew kiba la snewngiah bad dap haduh u pdot haba iohsngew ha ki por Election kum ki kam Pud kam sam bad ka Assam, ka Innerline Permit, ki kam Mynder Ri, Meghalaya Assam Joint Cadre Service bad kiwei kiwei de ki ba la shu pynmyllen kai ia ka jaidbynriew kumba thok ki kmie ki kpa ia la ki khun ban wan thied kata ne uta, haba kim don pisa ruh. Ko paradoh parasnam, to ngin ia klet noh ia ka jingsngewieit paraniam, sngewieit Party BJP, Congress, NPP, UDP, HSPDP lane ia kano kano ka Party hynrei to ngin ia jied thymmai ia uno/ kano U/ ka MP ba la pass Hindi bad ruh kiba la stad ruh ban kren (Fluent) khnang ba ki kham lah ban iatainia hapoh Dorbar Loksabha lane Rajya Sabha. Nga tip ba bun byllien bah ki samla kythei bad shynrang kiba la pass Hindi hapoh ka Ri ka jong ngi bad to ngin ia ailad noh ia ki, khnang ba lehse kan don noh ka jingkylla.D. K. Iawphniaw.