Nyngkong nyngshab ngi dei ban sngewthuh shai ba ka Sohra ka dei ka shnong/thaiñ kaba la ithuh shai ha satlak jong ka pyrthei namar ine long tang iwei i nuksa wat lada ngi leit tang ha ki para shnong khasi ruh ba kham sha kyndong ngim da don kam eh ban pynithuh na ka shnong aiu ne dong aiu ba ngi shong ngi sah, hynrei tang ong na Sohra baroh ki la sngewthuh. Te shuh shuh haba ngi leit lei sha ri thor/ ri dkhar ne wat shaduh shilliang sohmyndur (foreign countries) ki tip beit haei ka Sohra (Cherrapunjee) ka don.
Nangne ngi sngewthuh shai ban ngi nang pynneh,pynphuh pynphieng pynskhem bad tei mot shuh shuh ïa ka Sohra. Kaei ba ngi angnud kum ki nong Sohra ka long ba ngin ioh district beit dei tang da kawei ka sur ha kaba ngin weng ia la ki lama jong ki kynhun saiñhima (politics) sharud bad hangta ka ka jingangnud jong ngi baroh kan sa urlong. Ngi ngeit skhem ba ïa ka district ngin ïoh khlem pep hynrei kumba kren ne pynsoh kyrdot u Myntri Rangbah ba don burom jong ngi ka long tang ka daw ban khang lad.
Namar kat kum ka jingwad jingtip ba ka jing dawa district ïa ka Sohra ka dei beit tang ïa ka Sohra Civil Sub-Division hynrei ym kumba ong u Myntri Rangbah da ka ktien nongwei ‘Sohra Geographical landscape not in consensus’, kaba mut ba ngim don ka jingiamynjur bad u pud u sam, hynrei lada la ngi peit sani bha ba naduh shuwa jong u snem 2018 ter ter ba ka jingdawa district ka dei beit tang ban kyntiew ïa ka Sohra Civil Sub-Division sha ka district ym da kum wei pat. To ngin law ïa une u sohsah da kaba ngin pynskhem beit ïa ka Sohra Civil Sub-Division hynrei ban ym ïa khleh khaw lang. Namar halor ka jingtip ba thikna ruh ba shuwa jong ka u snem 2017 ka Pynursla kam pat kwah district hynrei ki dawa da ka Pynursla Civil Sub-Division, kaba ki la ioh mynta.
- Ka ban ngin ïa lap iawer bad pynsngewthuh ka long ba lada ngi kyntiew beit ïa Sohra Civil Sub-Division sha ka district kine harum ki long jingmyntoi:
a) Nyngkong nyngshab kan nym pynkhlumar khlieh ïa ki nongialam jong ka kam saiñhima ha kaba ba ïa dei bad u pud u sam (administative unit).
b) Jingiajan bad ka bor synshar sorkar (governance).
k) Ngin ïoh la ka jong ka DSC ha kaba lad ïoh kam ioh jam ïa kiba bun ki samla jong ka jong ka thaiñ (Sohra District) hi baroh kawei.
d) Kin bun ki lad jingiarap (fund/scheme) bad ka roi ka pa (development) ha ba ïoh ka district thymmai.
- Khnang ba u Myntri Rangbah badon burom jong ngi ym ioh daw shuh da kumwei pat kumba u la khlei teng ha ki snem ba la dep ba ym lah ban thaw district thymmai namar ba jyndong ka pla tyngka (financial crisis) jong ka Jylla, te ban wan weng ia kane te ngi don kam ban pynneh beit ïa ka headquater ha ba don ka Civil Sub division kaba mynta hi. Kine katto katne kiba yn bynrap halor ka headquarter jong ka District:
a) Ka jingpynkylla beit tang ka signboard jong ka Sohra Civil Sub-Division sha ka ophis Deputy Commissioner bad ka ïaid kumjuh ruh ïa kiwei ki ophis sorkar.
b) Headquarter kaba don mynta ka lah long pdeng lypa bad kumba shu ong noh wat ka ka sorkar phareng ruh ki ïohi ia ka jinglongpdeng jong ka Sohra wat ban pynlong kum ka nongbah (Capital) jong ka Assam naduh u snem 1932 te ban shuh ïa pyrkhat tang ban long i headquarter jong ka district lei ka long kaba la biang nadong shadong.
k) Lah jan don lut ki ophis sorkar ha kane ka headquarter jong ka Sohra Civil Sub-Division khynthup ïa ka hospital, skul bad college. Kine ki pyni ba ngi lah biang lut bad kan pynjah luksan ruh ïa ka sorkar.
- Kaei pat ki jingduh jingmyntoi lada ngi rah ne dawa headquarter jong ka district thymmai sha kiwei pat ki jaka:
a) Ka don kam da ki spah klur ïa ka sorkar ban shna headquarter thymmai kaba ka sorkar kam lah bei tyngka.
b) Lada rah sha ki jaka kiba dei ki thaiñ nyngkyndong (rural area). Kumba ngi ïoh bun na ki nongkyndong ki ioh ïa ka scheme 100 sngi (MGNERGS) hynrei kine ki lad jingiarap kin duh noh bad kan ktah shibun ia ka ioh ka kot ne ka roi ka pa.
k) Ki shnong kiba don hapoh headquarter jong ka district kin hap hapoh ka jingpeit jingi jong ka Municipal Board, i) Kin hap siew khajna ii) Kino kino ki jingtei ne shna hab shim permission na ka Municipal Board kumba ong noh wat tang ban pynmih baranda ruh hap ioh jingbit. iii) Wat ka jingtrei jingktah ruh kum ka tih maw/dewïong ne buh ia ki stone crusher ruh ki hap don da ki license bad bud ryntih ïa ki aiñ ki Kyndon jong ka bor district ne sorkar.
k) Ka ktah ia leit ka wan ki thaiñ war ba sharum la da rah shawei ïa ka headquarter.
To ngin ia leh la ibor i buit ban kyntiew beit ïa ka Sohra Civil Sub-Division sha ka district kumba long kiwei pat ki district kiba dang shu ïoh shen ne thymmai. Te kumba ngi khmih lynti ha ba wan ka district thymmai kan wanrah ïa ka roi ka pa ka ban long salonsar. Te kumta sa shisien ngin pyrkhat bha ban pynneh beit ia ka headquarter kumba ka long mynta (Saitsohpen), hynrei ngin dawa ba ki ophis bapher bapher kumba ai nuksa ïa ki ophis agriculture dei ban don sha ki jaka ba bun ki jaka rep, ka ophis veterinary pat kin don sha ki jaka ba don ki nongri jingri bad kumta ter ter. Nga kyrmen ba da ngi ieng da kawei ka sur ha kaba ka sorkar ruh kan nym lah ban pynslem shuh namar ba la dep pynbna bad kubur hi ruh da u Lamphang (speaker) ba don burom, bah Metbah Lyngdoh ha ka 2tarik March, 2021 lyngba ka lad pathai khubor ba ka Sohra bad Mairang kin ïoh noh ïa ka district ba pura. Sa shi sien to ngin ïa long kiba sngewthuh jingmut ba ka jingthmu baroh kan long kaba jop hynrei ioh poi sha ka duh syndon.
“To ngin nym ïa die ia ka sngi ban thied da u mombiti”
Da U Rangbah S. Kharwanlang
Sohra.
Pat long geographical and population pat i long… Nai pat kwah long kpa Jubor . Ka mairang ka la dei hok ban ioh
Nai kwah kren khraw pyrkhat than mo…ka Sohra ka la don hok Shibun Shah ban ioh ia ka District