To Leit sha ka Pyrthei

AIS SUJA

To Leit sha ka Pyrthei, to ialap ia ka Gospel ha ki bynriew baroh,,, Markos 16:15. Kine ki long ki kyntien ba u Jisu u la kren hadien ba u la mih pat. Hadien ba u lamihpat u la paw ha kiba bun.. U la paw ha ka Mary Nongmakdala, u la paw ruh ha ki arngut ki synran jong u. Hadien kane u la paw ha ki khadwei ngut ki synran katba ki dang iashong bam. Dei ha kata ka por u Jisu u la ong ha ki – “To khie leit sha ka pyrthei to ialap ia ka Gospel ha ki bynriew baroh.

Kaei kata ka Gospel? Ka dei ka khubor babha ka jingpynim ei ia ki briew baroh kaba da u Jisu Khrist n aka bynta ki pop baroh. U Blei u la phah ia ki khadwei ngut, ka ktien jong u ka la roi namar u la kren dalade hi – “kumta – kata ka ktien kaba mih noh naka shyntur jong nga; kan ympei suda hanga, hynrei kan pyndep ia kaba nga sngewbha, KANROI RUH HA KA BA NGA LA PHAH IA KA”. Isaiah 55: 11. Kumta hadien ki khadwei ngut kiba la ialap ia ka Gospel u Khrist, ka la roi shisha haduh katne. Naka pateng sha ka pateng bynriew ka ktien u Blei ka Gospel u Khrist ka la nangroi bad la bun kiba iohsngew bad pdiang ia ka Gospel ka jingpynim.

Ka jingkhot kamdei tang ia kito ki khad wei ngut, kamdei tang ia ki pastor ne rangbah balang ne tymmen basan, hynrei u khot ia baroh kiba ngeit bad pdiang ia ka Gospel u Jisu Khrist. U khot ianga u khot ia phi ki nongpule ia kane ka khubor babha u Jisu Khrist. Ngi long ki sakhi ia ka Gospel u Khrist khlem jinglehrain. Uno uno uba ialap ia ka Gospel u Jisu Khrist u dei ban ngeit bad ioh pynbaptist. Hynrei uta u bymngeit yn pynrem. Markos 16:16.

Haba u Jisu u laphah ban ialap ia ka Gospel ha ka pyrthei, u la kular ruh ban ai ia ka Bor (power) jong ki kambah (Miracles). U ong – “Ki dak kin bud ia kita kiba ngeit! HAKA KYRTENG JONG NGA KIN IABEH NOH IA KI KSUID, kin kren ki thylliej thymmai……… kin buh ia ki kti ha kiba pang BAD KITA KIN KHIAH” Markos 16:17-18.

Kane kadei kata ka jingphah jong u Jisu Khrist ban ialap ia ka Gospel jong u, ymban ialap pynkylla niam ia ki briew hynrei ban pynphai ia ki sha ka Gospel u Jisu khrist ban ioh map ki pop baroh, namar ba u Blei u donkam ia ki briew baroh hangne ha pyrthei. Ka ktien U Blei ka kren shai ia kata da kaba ong – “Naba u Blei u la ieit katta katta ia ka pyrthei, katba u la aiti noh ia u khun ba la kha marwei”, Ioanis 3:16. Kane ka hokum “To leit,, ka kynthup lang ia baroh kito kiba ngeit bad kiba laioh pynbaptist. Kampher la udei u nongbylla, u nongtrei kam lajong, ubabu ne u Ophisar, ka jingkhot ka long kajuh. U Jisu u khot ia ki nongtong Dohkha, ia ki nongkhrong, u khot ia ki doctor, u khot ia kiba biej bad kiba stad ha kato ka por. Ka jingkhot ka dang long kajuh namar u Jisu u dei u juh hynnin, mynta bad sha bymjukut.

Ka jingkhot jong u Jisu Khrist te ka la long kaba seisoh mynta, namar ki la bun kiba ialap ia ka Gospel u Khrist. La ialap ruh ia ka Gospel u Jisu khrist da ki bun ki lad ki lynti, khnang ban pynstet ia ka jingialap khnang baka pyrthei baroh kan ioh sngew ia ka Gospel u Khrist ka Gospel ka jingmap ei. Kumta la pynbna la ialap lyngba ki media ba bun rukom, lyngba ki Radio, Television, ki mobile internet, ki kot khubor bad kumta ter ter. “uta uba ngeit ha u yn ym pynrem, hynrei u bymngeit u la rem lypa” Ioanis 3:18.

Ka jingialap iaka Gospel u Jisu Khrist ha pyrthei mynta lah bun ba la dep kaba sah malu mala. Bun hi ki la iohsngew uei u Jisu? Kaei ka Gospel? Ia ka ktien u Blei ruh la pynkylla (translate) ha kiba bun ki jait ktien ha kylleng ki Ri ka pyrthei. Lah ban ong ba lah jan dep lut mynta ban pynsngew ha ka pyrthei ia ka ktien u Blei ka Gospel u Jisu Khrist.

“Te ia kane ka Gospel jong ka Hima (hima ki Bneng) yn ialap ha ka pyrthei baroh ia ka ban long ka jingphla ha ki kynja bynriew baroh – ynda kumta kein KAN JIA KATA KABA KUT”. Mathaios 24:14. “Ka bneng ka khyndew kin leit noh hynrei ka ktien jongnga kan ym leit noh satia” Mathaios 24:35. Amen