To hikai ba ngin tip ia la ki sngi

AIS SUJA

To hikai ba ngin tip ia la ki sngi. Kamut ba u briew udei ban pdiang ia ka jinghikai ka ktien u Blei namar ha ka ktien u Blei ka don ka jinghikai ba kumno u briew u dei ban pyrkhat ialade shaphang la ka jingim. U David u kyrpad ha u Blei da kaba ong – “To hikai ia ngi ban Niew ia ki sngi jong ngi, kumta ban gin pynioh ha ngi ia ka dohnud ka jingstad. Salm 90:12.

U David u pan ka jingstad na u Blei khnang ba un lah ban iohi ialade kumno u long bad kaei ka jingim. Bunsien u briew um ju niew um juh pyrkhat shaphang ki sngi ki snem jong u. u briew u sngewkhlain sngewdap sngewbiang katba u dang koit dang khiah wat haba u la tymmen. U briew u sngew ba kane ka jingim kan neh beit kumne u sngew ba ka pyrthei kadei ka jong u, u pynleit jingmut tang ia kiei kiei kaba ka khmat jong u ka iohi, hynrei ia kata ka bymiohi um juh pyrkhat. Um pyrkhat kaba kum kano kane ka jingim ha pyrthei.

U David u ong – ki sngi jong ngi ki iaid jah noh ha ka jingbitar jong me (jong u Blei).Ngi pynleit ia ki sngi ki snem jong ngi tang kum ka jingiathuh khana kai (hakane ka pyrthei) ki sngi ki snem jong ngi ki long 70 snem lane namar ba khlain eh 80 snem. Salm 9-10.
Bun na ngi ngim juh pyrkhat tang katno tylli ki sngi ki snem ngi don hangne ha pyrthei, ngi kam kynti ia ka pyrthei ngi sngew ba ka pyrthei ka long ka jong ngi, ngi iabeh ia kiei kiei kiba ha kane ka jingim khlem pyrkhat ia la ka mynsiem, kum uto u riewspah uba biej uba ong – ko mynsiem pha don shibun kiei kiei ba la buh na ka bynta bun snem, shongsuk bam suk dih suk to leh kmen (enjoy). U Jisu u ong- Ah me u biej ha kane ka miet yn shim noh ia ka mynsiem jong me na me, te ki jongno kine kiei kiei kin long ia kiba me la khreh lypa? Loukas 12:19-20.
Bunsien ka jinglong briew te ka long kumta ngi khlem pyrkhat satia aiu kan jia. Dei na kata ka daw u Blei u kwah ia ngi ba ngi dei ban phai sha u ban pyrkhat ban ioh jinghikai na u shaphang kane ka jingim briew haki rta kiba lyngkot eh ba ngi lah ban don hangne ha pyrthei.

Dei halor kane ka daw ba u Job u shakri u Blei u ong – u briew ba la kha naka briew u long uba khyndiat ki sngi u dap tang ka jynjar. U wan mih kum u syntiew te la ot noh ia u. u phet kum ka syrngiew bad um neh. Me la buh ia u pud ba um (briew) lah ban ryngkang. Job 14:1-5.
U David u ong – ki sngi u briew ki long kum u phlang, kum u syntiew halum, kumta u phuh. Ka lyer ka iaid halor jong u, te um don shuh ia ka jaka jong u ym ithuh shuh. Salm 103:15. Kata kadei ka jingim u briew.
Kumta u briew u donkam ka jingiajan tam bad u Blei, namar u Trai u long hajan ia kita baroh kiba khot kyrpad ia u. Salm 145:18.
U briew u dei ban pyrkhat ia la ki rta katno u don? Aiu udei ban leh? Un pynsngewbha ia u Blei ne ia u Soitan? Kine ki long ki jingkylli jong ka jingim. U David u ong haba u la tymmen- Nga la tymmen, nga phuh niuhlieh Ah Trai wat iehnoh ia nga. Wat kyntait ia nga haka por ka jinglong tymmen jong nga, wat ieh noh ianga haba ka duh ka bor jong nga. Me long ka jingshaniah jongnga naduh ba nga dang samla. Me kyrshan ia nga naduh ba dang kha. Me la shim noh ianga naduh ka kpoh ka kmie jong nga. Salm 71:1-24.

U David u pyrkhat, u iaroh ia u Blei naka bynta ka jingim jong u ba u Blei u da (protect) ia u wat haduh ka por jinglong tymmen. Ym lah ruh ban klet ia u wei u Riew stad (scientist) u Charles Darwin, uba la len ia u Blei shisien ha ki rta kiba u dang khlain, u sngew ba ka pyrthei kadei ka jong u lyngba ka jingstad science jong u. Hynrei ha ka por tymmen por thiah pang – U ong ba u don u Blei bad ba kiei kiei baroh ki long ki jong u Blei bad na u Blei. Kaba sngewtynnad ka long ba u iathuh sha ka pyrthei ba u don u Blei uba la leh ia kiei kiei kiba khraw, u ong ba u la babe ba u la pynngeit ia ka pyrthei lyngba ka jingstad jong u kaba u la batai shaphang ka Theory of evolution (1809-1882). U phla ba u don u Blei uba pyniaid ia ka jingim jong u bad kaei kaba ka ktien u Blei ka kren ka long kaba shisha bad Amen.
Namar kata u briew umlah ban jngai na u Blei. U briew u donkam ban ioh ia ka jingstad na u Blei bad shaphang ki ain jong u. Ka donkam ia u Briew ba un nang ban niew ia ki sngi ki rta bad ban ioh ia ka jingstad ba kynja Blei, khnang ba ka jingim kan ymlong kaba lehnohei.

“To hikai ba ngin tip ia la ki sngi” Salm 90-12.
Amen.