Tip ka JHADC, tang ban die, ban sumar kam don por,ujor ka KSU, halor ka wah Lukha

Shillong: Ka Khasi Students’ Union (KSU) Narpuh Circle ka ai ka jingkyrshan ia ka jingdawa ka 6 Shnong Wah Lukha Association na ka JHADC ban aiti noh ia ka wah Lukha ban peit bad pyniaid da katei ka Association na ka bynta ka jingbit jingbiang, ka jingmyntoi bad ka jingiohnong ki paidbah. Kumba long mynta ka Council ka die lilam ia ka wah lukha manla u snem da kaba khot tender ia kino kino kiba kwah ban shim wai, hynrei kane ka jingdie lilam ia ka wah lukha ka pynioh nong tang ia uwei uba thied bad ka pynduh nong pat ia uba bun ba lang.
Haba phai sha ki snem ba la leit bad haduh mynta ka District Council kam juh don ka jingkitkhlieh ha ka jingiadei bad ka jingjaboh ka wah Lukha bad ka council hi kam juh tuklar mynno mynno balei ka wah lukha ka blue bad iap pathar ki dohkha. Kane hi ka pyni ba ka council ka tip tang ban die, hynrei ban sumar pat kam don por. Kumta ka council ka dei ban sangeh noh ka khot tender ban lilam ia kane ka wah bad ban aiti ha u paidbah lyngba katei ka Association ban peit ban sumar. Ka JHADC kam tip ba haba die lilam ia ka wah lukha sha ki riew shimet ka wanrah ka jingduh jait ia ki symbai dohkha, namar u nongthied um bna eiei ia ki kyndon ba la bthah da ka council. Tang na ka bynta ban iohnong ban myntoi ia lade, u nongthied um salia ban tong naphang bad rit bad khraw bad pynkheiñ syndon ia ki kyndon aiñ ba la buh. Shuh shuh la ong ba katkum ka jingiathuh ki riewtymmen ne ki rawon nongkhwai dohkha, ba shisien ba uto u nongthied wai ia ka wah lukha u wieh jar ban tong dohkha ki rawon kim myntoi shuh ban khwai namar ki dohkha kim dait shuh namar ki sngewthuh ia ka jingsma jar. Kane ka wanrah ka jingduh nong kaba khraw ia ki paidbah ba im bad kamai ha kane ka wah. Kitei ki 6 shnong ba kynthup ia ka shnong Sakhri, Umtalen, Sonapyrdi, Shymplong, Borsara bad Kuliang ba don hapoh ka shatri ka 6 Shnong Wah Lukha Association ki kwah ban pynlong ia ka wah lukha kawei na ki jaka ba pawnam ba itynnad ban khring ia ki nongjngoh kai pyrthei. Kane ka jingthmu ka long na ka bynta ban long kum ka lad ban pynioh kam ioh jam ia ki trai shnong. Da ka jinglah ban pynneh pynsah ia ki dohkha ba bunjait kan wanrah ka jingitynnad bad khring ia ki nongwan jngohkai. Ka seng ka sngewiahap ia ka jingdawa ba shongnongrim jong katei ka Association bad ka KSU, ka ai ka jingkyrshan ia katei ka jingangnud u paiibah bad ban ia trei lang na ka bynta ka jingmyntoi ia baroh, ong u Samla Deibormi Dkhar General Secretary.