Tieng ki Rangbah Shnong ioh kylla Cock Badminton ka VAB

Shillong, 21 Nailur:
Mynta ka sngi ka Synjuk Ki Nongsynshar Shnong ka Bri u Hyn-niewtrep ( SNSBH) ka la ia kynduh ia u Chief Executive Member (CEM) ka KHADC u bah Pyn-shngaiñ N Syiem ban pynkynmaw ha u ba u dei ban shimkhia ban pyn-urlong noh ia ka Village Administration Bill (VAB) kaba dang sahkut mynta ha ka tnad pohing ka sorkar pdeng.
Haba ia kren bad une u nongthohkhubor u General Secretary katei ka Synjuk u bah R.L Blah u la pynkynmaw ia ka jingiakynduh ka Synjuk bad u myntri rangbah ka jylla ha kaba u la ong ba ki la pynpaw ba ki sheptieng ioh ba ka VAb kan long pynban kum uto u Cock ia tied Badminton uba shu kawut na kawei ka liang sha kawei pat bad dei na kata ka daw ki wan ban kynduh ia u CEM ban pynsted noh ia katei ka kam.
U la ong ruh ba u myntri rangbah ka jylla u la pynpaw ha ki ba dei ban weng noh ia ka VAB na ka sorkar pdeng khnang ban lah ban saiñdur thymmai da ka aiñ kaba paka ia ki Rangbah shnong hynrei halor katei ka jingong u Dr.Mukul u bah Blah u la ong ba ki la jubab ba kim dei ma ki kiba shna ia ka VAB hynrei ki dei tang ki paidbah hynrei la shna ia ka da ka District Council bad ki dei ma ki ka hok ban rai kumno, bad ka rai ka dei hapdeng ka sorkar jylla bad ka District Council.
Haba ia kren pat bad u bah Pynshngaiñ u la ong ba ka Synjuk ki Nongsynshar Shnong ki la kwah ba ka Council kan shimkhia ban pynurlong noh ia ka VAB kumba long ha ri Lum Jaintia bad hadien ka jingiatai kaba sani bha u la ong ba ka District council kan thoh sha ka sorkar ban pynkynmaw ia ki jubab jong ka Council halor ki 12 tylli ki mat ba ka MHA ka la pan jingshai.
Haduh mynta u la ong ba um don jingtip la ka sorkar jylla ka la phah ne-em sha u Lat ka jylla ne sha ka MHA ia kitei ki jubab jong ka Council halor ka VAB.
Kumba ka long mynta u bah Pynshngaiñ u la ong ba ka VAB ka dang sahkut ha ka tnad MHA ka sorkar pdeng.
Haba la kylli pat aiu un leh halor ka jingkren u myntri rangbah ka jylla u Dr.Mukul Sangma ba ka Council ka dei ban sei noh ia ka VAB na ka MHA bad ban wanrah thymmai pat sha ka jylla ban ia kren pynbeit ia ka aiñ ki Rangbah shnong ,u bah Pynshngaiñ u la ong ba u hap ban lum ia baroh ki MDC ban ia kren ia katei ka kam.
Ha katei ka jingiakynduh la don jan baroh ki nongialam jong ka SNSBH ba kynthup naduh u President u Dr.W.Kharshiing, General Secretary R.L Blah bad kiwei pat, katei ka jingiakynduh ka la long tang hapdeng jong ki bad u CEM.