Tied miej U Bah Mansturdy, ba jah ki tiar na kudam ka KHADC

Shillong,
24 Rymphang:
U MDC ka Congress na Langrin u Bah Mansturdy Nongrem u la tied dain mynta ka sngi, namar ba u la bitar ia ka jingbym lah ban ai jingshai shaei ki tiar jot ba la pynpra na ka iing ba rim ka KHADC, la buh.
Haba shim bynta ha ka jingiatainai halor ka jing ia tai nia ia tynjuh bor, pyrshah ia ka Executive Committee, u Bah Nongrem u la sei da ka kot jingthoh kaba u la ioh na ka ophis jong u CEM kaba la ong ba ia ki tiar jot ba pynpra na ka iing barim ka KHADC la buh ha kudam ka Council. Hynrei u Bah Nongrem, u la ong ba u la leit iit ia ki, la shem ba kim don shuh.
“Kane ka dei ka jingthok jong u CEM ia nga bad ia ki 23 hajar ngut ki paidbah jong nga namar ba u ai ka jubab kaba thok”, la ong u Bah Nongrem.
U la ong katkum ka jingthoh ba la ioh na u CEM, la iathuh ba ki tiar ki don ha kudam hynrei kaba sngew phylla ka long ba kim don eiei ha kudam. “Shaei jah lut ki tiar jot ba la lum na ka jingpynpra ia ka iing ka Council”, la ong u Bah Nongrem.
U la ong ba kane ka EC ka la ialam bakla ia ka iing bad ia ki dkhot jongka, da kaba ai ia ka jingtip ka bym shisha bad namarkata, ka liangpyrshah ka la wanrah ia ka jingbymshaniah shuh ia ka.