Nongstoiñ: Tang hadien katto katne kynta ba u Myntri ka kam pohiing jong ka sorkar Jylla, u la leit phai noh hadien ba u la dep ban plie ia ka Multi- Purpose Centre hapoh ka shnong Malangkona West Khasi Hills, ki briew jong ka Assam ki la wan ban wanthew ia ka surok Mallangkona – Hahuapara kaba don hajan ka kshaid Chongga Dare.
Ka tyllong khubor ba la ioh lum da u nongthoh khubor ka iathuh ba katei ka surok ba la wan thew wan woh da ki briew jong ka Assam ka dei kaba la pyntrei da ka shnong Malangkona lyngba ka skhim MGNREGS napoh ka Mawshynrut Block bad hadien ba ki paitbah nongshong shnong, ki la ioh ia ka jingtip halor katei ka jingwan ki briew ka Assam ki la leit ban kylli, hynrei ki briew jong ka Assam ki la ong ba ki mut ban pynbha ia katei iaka surok ba leit sha katei ka kshaid.
Shuh shuh la ong ruh ba haba ki nongshong shnong jong katei ka thaiñ ki la phah leit phai noh ia kitei ki briew jong ka Assam halor ka nongrim ba kim shym la kynjoh ktien shwa na ki bor jong ka shnong shwa ban wan thew wan woh ia katei ka surok bad hadien katto katne por ba la shah pynphai kitei ki briew jong ka Assam la wanpoi sa da ki pulit Assam bd ki CRP kiba la shoh la bom naphang ia ki paitbah bad rah ruh ia ki riew rangbah sha thanad Boko bad ki paitbah jong katei ka shnong ki khlem nud shuh ban thiah ha shnong bad baroh shimiet ki la leit thiah sha khlaw bad sha ki shnong ba marjan.
Kumta ha kaba iadei bad katei ka bynta na ka liang jong ka Seng FKJGP Mallangkona Border Area Unit, ka la pynrem jur ia katei ka jingleh riewkhlaw jong ki pulit ka Assam ba ki la shu shoh bad bom pathar ia ki paitbah khlem jingmap wat ia ki khunlung khynnah ruh ha ryngkat ka jingkem pathar ia ki riewrangbah sha thanad Boko.
“Kane ka jingleh ki pulit ka Assam kadei ka jingkhein poh (Insult) ia ka jingwan iuh kjat jong u Home Ministrer ha katei ka thaiñ da kaba ki la kput ia ki paitbah ba lui lui” ong samla Judis Regan Dkhar ha ka kyrwoh khubor bad u la ong shuh shuh ba ka balei ki pulit Assam kim wan ban shoh ia u Home Minister bad ha kaba iadei bad katei ka jingjia, na ka liang jong ka Seng ka dawa jur ia ka sorkar Meghalaya ba kan phah kloi ia ki bor pahara ban ai jingshngain ia ki paitbah bad ruh ban pyllait noh ia ki ba shah kem hapoh thanad Boko.