Tiak halor ki ILP bad CAB/CAA

B.M.Lanong

Sngewkmen ba ka Ing Dorbar Thaw Ain jong ka Meghalaya, ha ka 19.12.2019, ka la rai da kawei ka sur ban dawa ia ka Inner Line Permit (ILP), ia kaba ka kynhun Congress ka la kyrshan te kyrshan, tangba ka la bret ia u khwai bym shaniah ia ka sorkar MDA u Conrad Sangma hynrei u Speaker Metbah Lyngdoh ula leh ia kaba dei ba um shym la pdiang ia katei ka No-Confidence motion, namar la shu wanrah khlem da bud ia ki kyndon Assembly.

Lada dei ba ka sorkar Congress u Dr.Mukul Sangma, ka la pdiang ha u November 2012 ia kaei kaba ka High Level Committee on Influx ka la tyrwa da kawei ka sur ban wanrah ia ka ILP, ia kaba, ia katei ka Committee kaba u thung hi u Dr.Mukul, kum u Chief minister ha ka 4.9.2012, ban ai jingmut halor kane ka mat, lehse katta kan jin da la long da kumwei.

Hynrei u Dr.Mukul ula kyntait ia ka jingai jingmut katei ka Committee, kaba la thung ia u Bah B.M.Lanong, Deputy Chief Minister Law, kum u Chairman, 4 ngut ki Minister, Bah P.Tynsong, R.C.Laloo, H.D.R.Lyngdoh bad Kong Ampareen Lyngdoh. Nalor kitei, la thung 3 ngut ki MLA, Bah Metbah Lyngdoh, Lakmen Rymbui bad Ardent Basaiawmoit. 3 ngut ki Khlieh Nongsynshar Hima, 3 ngut na ki Civil Society, Bah G.P.Wahlang (IAS Retd), Toki Blah bad Kong Patricia Mukhim bad ki Seng Bhalang NGOs, KSU, JSU, GSU, FKJGP, JYF, AJWO, RBYF, CSWO, KWWADA bad SSSS.

Katei ka Committee kaba la iakynduh 4 sien, kam shym sngap ia kiwei-kiwei ki jingai jingmut, hynrei da kawei ka sur, ka dawa beit ia ka ILP. La don na ka liang ki Civil Society kiba tyrwa da ki card system, hynrei, ka sur uba bun-balang kam pdiang.
U Dr.Mukul u kyntait ia ka jingai jingmut katei ka Committee hana, ba ka Congress kam shym buh ILP ha ka manifesto jong ka bad ynda ula wan phai biang kum u Chief Minister ha u 2013, u pynmih pynban da ka ain Landlord and Tenancy Act 2013, kaba dei bad ki trai ing bad ki nongshong wai.
Tip ha ka por ba u thung ia katei ka Committee, um shym tip sieh mo ba ka ILP kam don ha kata ka Manifesto jong ka Congress?
Mynta pat, hato ka la don ha ka Manifesto 2018? Namar mynta ba um don shuh ha ka shuki, ula dawa ILP, kumjuh ruh baroh ki Congress ha Meghalaya.
Tip ki Seng bhalang ruh balei kim shym iakhih ha katei ka por, haba u Mukul u bret ia katei ka rai Committee sha sympit?
Ka ILP
Ka don kane ka ain (Inner Line Permit) kaba la pynpoi shaduh kine ki thain lam mihngi (NE Region), ha kaba la pynjari la slem bah ha Nagaland, Arunachal, Mizoram bad mynta la dep mynjur na ka bynta ka Manipur ruh. Nalorkata, wat ia ka district rithor Dimapur jong ka Nagaland, kabym shym rung katei ka ain, mynta la pynrung da ka sorkar Nagaland.
Kane ka ain ha ka jingshisha ka sdang ha u snem 1873 ha Bengal, ia kaba ju tip kum ka Eastern Bengal Frontier Regulation 1873.
Ha ka jingshisha, ia kane ka ain la pynpoi ruh shaduh Assam ha ki snem 1915, na kata ka daw, kitei ki jylla ba la kdew haneng, kiba ju don mynshuwa ha Assam ba-iar ki la ioh ILP naduh kitei ki snem, khnang ban pyrkhing ia ka jingwan rung ki briew na kiwei ki jylla, khlem ka permit (Ain Aibor).
Ha ka jingshisha biang, wat ia ka ri Khasi-Jaintia ruh ka la don ka jingmang, hynrei ka Sorkar Assam, kaba pynlong nongbah (capital) ha Shillong, kam shym patiaw ei-ei ban kynthup ia ka ri Khasi-Jaintia hapoh katei ka ain.
Kumta, ka don ka lad ban pynrung ia ka, wat mynta ruh, tangba ka jingmynjur (approval) ka Sorkar India ka donkam, ym kumba iakren paidbah hangne-hangtai.
Ka CAB/CAA
Kane pat ka dei ka jingpynbeit (amendment) ia ka ain Citizenship Act 1955, da kane ka Citizenship Amendment Bill 2016, (CAB) kaba long CAA mynta, (Citizenship Amendment Act) 2019, hadien ba ka Ing Dorbar Lok Sabha bad Rajya Sabha ki la dep mynjur ban pynkylla ia katei ka CAB. Da kane ka amendment la plié lad ia ki 6 jaitbynriew kibym dei ki Muslim, kata ki Hindu, Sikh, Buddhist, Kristan, Parsis bad ki Jain, kiba don sha Afghanistan, Bangladesh bad Pakistan ba kin wan phai sha ri India.
Ban kham shai, ka jingpynbeit ia katei ka ain, Citizenship Act 1955, ka dei ia ka Section 6, Citizenship by Naturalisation, kaba ailad kyrpang ia kibym dei ki nong India, ba kin iohlad ban long nong India hapoh ki kyndon kiba la kdew kyrpang.
Ki seng sian pyrthei bad seng bhalang ki pyrshah jur ia kane ka jingrai ka sorkar u Modi, namar ba ki ong ba ka BJP ka thmu ban wanrah bun ki Hindu sha ri India, khnang ba ki Hindu kin kham donbor ha ka synshar-khadar.
Ka jingiakhih ha Assam lei ka kham jur, namar ka la don ka jingiateh hapdeng ka sorkar India bad ka All Assam Students Union (AASU) ha u snem 1985, ba tang kito kiba la don hapoh Assam haduh ka shiteng miet jong ka 24.3.1971, yn ailad ba kin long ki nong India. Kane ka rai mynta ka la pynkylla khongpong ia katei ka jingiateh. Ka Assam ka la dap da ki nongwei Bangladesh, kiba la wan rung hadien katei ka tarik.
U Lat barim ka Assam, u Lt.General (Retd) S.K.Sinha, u la ai ia ka report jong u sha ka Sorkar India ha u snem 1998, kaba la kdew ia ka census jong ka ri Bangladesh, ba hapdeng ki snem 1971 bad 1989, 75 lak ki Hindu Bangladesh ki la jah kynsan, kaba mut, ba kitei baroh ki la wan rung ha kylleng ka ri India, kynthup ia ka Assam, kaba la don mynta da ki phew lak ki Bangladeshi Muslim.
Ha kaba iadei bad ka CAA (CAB), ka sorkar India ka la mynjur ba kan pyllait ia ki jylla ILP bad 6th Schedule na kane ka ain.