Thylli ki dukan ka Iew KHADC, ha Byrnihat bym treh ki nongiew

Shillong, 03 Iaiong:
Ki dukan ka Iew ka Khasi Hills Autonamous District Council (KHA DC) ha Byrnihat bun kiba thylli namar ba ki nong shong dukan kim treh ban shong namar ka jingbym biang ka jaka kaba khap ngiah bad khim palat.
Bun na ki nong shong iew ki ia shong dukan ha madan madiah kumba ju long ha ki por mynshwa namar ba ki dukan ba shna ka KHADC kim biang.  Ki don kumba 300 tylli ki dukan ba la shna kynthup kiba ha krum bad ha ki mala katba 22 tylli ki la shah pynpra noh na bynta ban pynheh ia ka surok 4 lane.
Katei ka iew ba la shna da ka District Council kam long satia kaba ai jingmyntoi ia ki paid nongiew kiba wan shong dukan, na ka daw ba ka rukom shna ia ki duakan kam biang bad mynta bun ki dukan ki thylli ha ki sngi Iew naba kiba bun ki dang shong ha madan.
Ka District Council ka la shna ia katei ka Iew Byrnihat ha ka jinglut kaba T.2 klur eiei da ka jingthmu ban pynbit pynbiang ia ki nongshong dukan bad ki nongthied nongpet, kiba kylla long pynban ki jingtei ba pynwit ia ki nongwan iew wan hat bad ki nongshong dukan khamtam ki stall ba long ar mala ym don satia uwei ruh u nongshong iew ban kiew ha katei ka mala.
U Project Engineer ka KHADC Bah FS Syiem ula ong, na ka liang ka ophis kam don bynta ia katei kam naba ki bor ba halor ki la ai ti ia kiwei pat ki riew shemphang ban dor dur na bynta ban shna ia katei ka iew.“Ka long ka jingjah burom ban iohi ia katei ka iew hadien ba la plie namar ka rukom shna kam biang satia, khamtam ka Iew Byrnihat kaba heh tam ha Ri Bhoi District la donkam ban leh janai bha” ula ong.
Ha ka jingshisha katei ka dei ka iew kaba heh bha ha kaba ki nongshong iew na Assaam kynthup na kane ka jylla ki tuid bha thied ba pet kum ka iew khappud.U Bah Syiem ula ong, ba ia kitei ki stall lah ban pynpra lada shna pynitynnad biang ia katei ka iew kumba long kiwei kiwei, kata ruh ka shong ha ka jingwan pisa na ka 14 Finance Commission, namar ka council ka angnud ban pynwan dur thymmai biang ia ka Iew. Katei ka Iew ka hap hapoh ka jingpeit jong ka Market Committee kaba kynthup ia ki riew rangbah na Byrnihat bad ophisar na KHADC ban peit na bynta ban ai wai ia ki  stall bad ruh ban lum bai musur na ki nongshong Iew.