Thylli ka shuki BDO Mawphlang bym don ophisar, ong u Bah Prestone

Shillong, 07 Risaw:
U Myntri ka tnad Community and Rural Development (C&RD)  u Bah Prestone Tynsong u la ong ba kim shym la lah ban thung ia u Block Development Officer (BDO) ba pura ha Mawphlang Community and Rural Development Block namar ba ka sorkar ka duna ophisar.
”Na ka liang jong ka tnad jong nga, ngi la phah sha ka tnad Personnel department ba donkam kyrkieh ban thung BDO ha Mawphlang C&RD Block.  Nga la iakren bad u Myntri Rangbah Dr Mukul Sangma halor kane bad nga kyrmen ban gin lah ban thung noh ia u BDO shen”, la ong u Bah Tynsong.
Haba kylli la ka dei namar ka jingiakhun u Bah HDR Lyngdoh bad u Bah Kennedy C Khyriem bas ah thylli ka shuki BDO,  u Bah Tynsong u la kyntait ba kam dei kaba shisha.
”Baroh ngut u Bah HDR Lyngdoh bad u Bah Kenedy Khyriem ki la iakynduh ia nga ban thung noh ia u BDO  ha Mawphlang kkoi. Ha ka jingshisha, baroh ar ngut ki la pynpaw ia ka jingsngew khia ia ka jingbym don BDO namar ba ki paidbah ki la iakynduh jingeh ia ki jingdonkam ba man ka sngi”, u la ong.
Hynrei ha kawei ka khubor, la kynnoh ba ka jingsah thylli ka shuki BDO ka dei namar ba iapyni bor u MLA ka Mawphlang bah Kennedy Khyriem bad u MLA ka Sohiong u Bah HDR  Lyngdoh kiba kwah ban wanrah ia u briew ba ki kham sngew iajan.
‘Ha ka jingshisha ka tnad C&RD ka la thmu ban thung BDO napdeng ki ar ngut ki ophisar hynrei namar ka jingujor jong kine ki ar ngut ki MLA ka Congress  la pynlong ia ka tnad ban sangeh shwa” , la ong ka thymmei khubor.
Ka ophis BDO Mawphlang ka la sah thylli la lai bnai eiei bad la shu phah peit lem ha u BDO ka BDO ka Mylliem C&RD Block.
Ka Mawphlang C&RD Block ka kdup ia kumba 246 tylli ki shnong bad kumba 72,000 ngut ki nongshong shnong katkum ka khanasumari 2010.
Ka Block ka kdup lang ia ar tylli ki  Constituency ka Mawphlang Constituency bad ka Sohiong Constituency nalor bun ki ophis sorkar kum ka PHE Dept., PWD, ICDS, Police Outpost, PHC, C&RD  bad kiwei.
Ka jingbym don u BDO ba pura ka la pynsahkut lut ia ki kam ki jam kiba ki paidbah ki donkam ba man ka sngi kiba hap ban soi da u BDO kum ki skhim bapher bapher.