Thwet tyngeh ki pulit, ia u MLA ka Mawhati sha Guwahati

Shillong, 06 ’lyngkot:
Ki pulit ka nongbah kila kem hynriew ngut ki briew ba shah kynnoh donkti ban leh ban ialam ia ka kam awria ia kawei ka khynnah 14 snem kaba la jia na Marvelene Inn ha Rlbong, kaba dei trai u khun u MLA ka Sohiong Bah HDR Lyngdoh, hynrei kim pat ioh kem satia ia u MLA ka Mawhati u Bah Julius K Dorphang uba la phet krad ban leit rieh sha Guwahati.
U Superintendent of Police (Crimes) u Bah Vivek Syiem haba kren mynta ka sngi, sha ki nongthoh khubor, u la ong ba nalor ki san ngut ba la shah kem kham mynshwa, ki pulit ki la ioh shuh sa uwei uba donkti ha kam awria na ka jingjia na Marvelenn Inn, uba la tip kyrteng kum u Sanjib Biswa bad baroh kiba shah kem, la poi sha ka 6 ngut. U Biswa u dei uba ialam ia ka khynnah na kawei ka jaka sha kawei pat, la ong u Bah Vivek.
Ha kajuh ka por, u la iathuh ba u MLA ka Mawhati u la phet rieh sha Guwahati, bad ki pulit kila pan jingiarap na ki pulit ka Guwahati ban kem ia u hynrei ym pat ioh kem haduh mynta.
“Ngi la hiar khynra ha iingsah jongu ha Shillong, ha Bhoi hynrei ym pat lap dien bad la leit kthong sha Guwahati ha kaba la suba ba u la phet rieh bad mynta ngi la pan jingiarap na ki pulit ka Assam ban kem ia une u MLA uba la shah ujor ejahar bal eh beijot ia ka khynnah”, la ong u Bah Vivek.
“Ngi la rejister saw tylli ki case ha kaba iadei bad kane ka kam khaii bad leh beijot kynthei kynthup 3 tylli ha Madanrting police station bad kawei ha Laitumkhrah kaba dei ia ka u Julius K Dorphang”, la ong u Bah Vivek.
U la ong ba u MLA ka Mawhati u dang phet rieh, bad hadien ba la ioh ka sakhi, ki pulit kila pynlong ia ka jingkhynra kylleng ki jaka ha nongbah, ha Khanapara, bad kham hadien la ioh jingtip ba u don shabar Guwahati.
“Ngi la hiar sha katei ka jaka, kaba la don ha ka iing saw mala jong u Anup Chetia u lehnoh ka ULFA ba pyndem wait, la khynra por 4 baje janmiet, hynrei ym pat lap, ba ula la phet rieh bad ka jingthwet la pynjur”,la bynrap u SP.
U la iathuh ba la ujor ejahar saw tylli ki ejahar ia u Bah Dorphan, kawei ha u SP ka Bhoi ba iadei bad ka kam leh beijot ha Bhoi bad lai ha Shillong halor ki kam runar jong u.
Kham mynshwa, ki pulit ka nongbah ki la kem ia ka Monalisa Shangpliang (22), ka Mamuni Parveen, ka Tarisha Mary Kharbamon, u Madan Bahadur Thapa na Jhalupara bad uwei u nongap katei ka hotel.