Thwet ki pulit ban kem ia ki President, Secretery jong ki 10 Sengbhalang

Shillong, 12 Nailur:
Ka sorkar ka la bthah ia ki pulit ban thwet bad kem ia ki nongialam sengbhalang khamtam lada lap ia kino kino kiba pynkulmar bad wanrah ia ka jingbym shongsuk shongsain ha ki kynta pakhang surok miet ba la khot pynlong da ki sengbhalang.
Na ki khubor ba la ioh lum la iathuh ba na ka liang jong u heh duh ka tnad pulit Director General of Police (DGP) u la bthah ia ki pulit ban thwet bad kem ia ki nongialam sengbhalang, kiba don bynta lang ha ka jingkhot pynlong ia ka pakhang shnong bad kumjuh ruh ka pakhang surok miet, khamtam ia ki nongialam ba kynthup ia u President bad u Secretary jong kine ki seng.
Haba la pyrshang ban wad jingtip halor kane ka hukum ban thwet bad kem ia ki nongialam sengbhalang, la sngewthuh ba na ka liang jong u DGP u la pynmih ia kane ka hukum hadien ba la ioh ia ka jingbthah na ki bor ba halor jong ka sorkar.
La iathuh ba katkum kane ka jingbthah ban thwet ia ki nongialam sengbhalang, la ong ba dei ruh ban kem beit ia kino kino ki briew kiba don bynta ban wanrah ia ki jingkulmar ha ki kynta pynlong jingiakhih da ki sengbhalang.
Kumba ka long mynta ka jingiakhih jong ki sengbhalang ka dang iaid shaphrang ha kaba ka pakhang surok miet ka dang iaid shaphrang bad ki la don ruh ki jingjia shah thang kali, shah thang ophis bad kiwei.
Lah ruh ba kdew hangne ba ki sengbhalang ki la hap ban shim da ka rai jingiakhih namar ka jingbym pyndem jong ka sorkar ban pyntreikam ia ka jingdawa ban pyntreikam ia ka ILP ha ka jylla ha kaba ka jingiakren ka la pulom noh naduh ka jingiakren ka sorkar bad ki sengbhalang bad kumjuh ruh bad ki seng sainpyrthei.