Thwet jur ki pulit ia u kha heh ka CMJ University

Shillong,
13 Jylliew:
Ki pulit jong ka jylla ki la pynlong ia ka jing thwet jur ia u kha heh (chancellor) jong ka CMJ University uba la phet rieh hadien ba la shah thwet ha kine ki sngi. Ki pulit ka jylla ki la pan ia ka jingtreilang jong ki pulit jong ki jylla bapher bapher ha ka ri ban wad ia u CM Jha.Ha ka jingshisha u Jha u la pan jamin lyngba u nongiasaid ain jongu hynrei na ka liang ka Kashari ka la kyntait ban ai jamin.
Katkum ka thymmei khubor, na ka liang ki pulit CID ka jylla Meghalaya, ki la ong ba u Jha um don satia ha Bihar wat ha ka jingshisha la kam ba u don ha katei ka jaka bad la suba jur ba u la leit phet rieh sha Nepal, kaba khappud bad ka jylla Bihar kaba u sah.
Ka CMJ University ka la mih ka kynrum kynram hadien ba u Lat ka jylla u RS Mooshahary uba dei u Visitor ka university u la ujor FIR pyrshah ia kane ka skulbah namar ba ka la iaid laid bad pynkhein ia ki kyndon da kaba ai syrnod degree khlem jingithuh da ka UGC.
Ki pulit ka tnad CID ki la khang tala ia ka ophis jong kane ka skulbah bad u Lat u la bthah ia ka sorkar jylla ban pynwai noh syndon ia kane ka CMJ University.
Watla kiwei kiba kham rit ki la shah kem hynrei u CM Jha uba dei uba kongsan tam jong kane ka university um pat shah kem satia. Ia ka bank account jong u Jha ha Shillong la bat noh da ki pulit.