Thungkam pura ka sorkar 16 ngut ki nong-Mawphlang

Shillong, 20 Naitung:
Ka tnad Public Health Engineering (PHE) ka sorkar jylla ka la pyn skhem da kaba thungkam pura ia 16 ngut ki briew ba dei na ka thain Hima Mawphlang bad ia kane, la iathuh da u Myntri Rangbah ka jylla u Dr Mukul Sangma hadien ba la wai ka jingialang ka kynhun myntri.
“Ka kynhun myntri ka la pynskhem ia ka jingtyrwa ka tnad PHE ban pynskhem ia ki 16 ngut kiba la shah thung kam kontrak ha ka tnad PHE halor ka nongrim ka jingiateh ba la iasoi hapdeng ka sorkar lyngba ka tnad PHE bad ka Hima Mawphlang ha u snem 1978″, la ong u Myntri Rangbah.
U la ong ba katkum kane ka jingiateh, ka Hima Mawphlang ka la ai jaka ei iaka sorkar ba kan shna ia ka tum ki tam ban sam sum sha ka nongbah Shillong bad kum ka bai nong ia ka jingai jaka ei jong ka Hima, ka sorkar ka la iateh ba kan thungkam katba lah ia ki briew kiba dei hapoh ka Hima Mawphlang na ka bynta ki kam Grade-III bad Grade-IV.
“Kum ka kular ba la iateh, ka sorkar ka la rai ban pynskhem ia ki 16 ngut kiba la thung kontrak kham mynshwa”, la ong u Myntri Rangbah bad bynrap ba ka tnad PHE ka la sdang ban thungkam naduh u snem 1980.
U la ong ba ia kane ia ka jingiateh la rejister ha ka ophis jong u DC ka East Khasi. “La pynskhem ia ki hadien ba la bishar bniah ia ka kot ki sla da ka tnad kam ain ka sorkar jylla bad kiwei  de”, la ong u Myntri Rangbah.
Kawei pat ka rai jong kane jingialang ka long ba ka la pdiang ia ka Service Rules ia ki tnad Water Reources kaba kynthup ia ka lai bynta, kawei ia u Chief Engineer, Executive Engineer, bad u Sub Divisional Officer (SDO).