Thungdieng U Syiem Jirang

Nongpoh: Ka ophis u Syiem Jirang Syiemship ha ryngkat ka jingiatreilang bad ka ophis u BDO Jirang, myn hynnin ka sngi ki la pynlong da ka prokram thungdieng, ha kawei ka jaka kaba don hajan jong katei ka ophis u BDO.
Ha katei ka prokram thungdieng, la wan ban iashimbynta ruh da u MLA ka Jirang, u Bah Sosthenes Sohtun kum u kongsan bad u Bah Victor Ranee, MDC kum u symbud kongsan, ha ryngkat ka jingdon u Paiem R.H Wahlang, Syiem ka Hima Jirang, u BDO ka Jirang lem bad kiwei de.
Khyndiat haba kren ha kane ka sngi, u Bah Sosthenes Sohtun, u la ong ba katei ka prokram kaba la pynlong ha katei ka jaka, ka la long kaba dei eh bad kaba dei ruh ban ai jingiaroh ia ka ophis u Syiem Jirang bad ia ka ophis u BDO.
U la ong ruh, ba ka jingthung dieng kam dei ban rakhe tang ha kata ka 5 tarik ne ka World Environment Day, hynrei haba peit ia ka jinglong jingman ka mariang, la dei ka por ba la hap ban thungdieng man ka sngi bad ban rakhe ia kata ka World Environment Day ha baroh shisnem shisnem.