Thung u SP da ka kynhun ban tohkit ia ka kam khaii kynthei ha West Jaintia

Jowai: Hadien ka jingioh pyllait ki pulit ia ki 20 ngut na ka jingshah khaii die met, myn hynnin ka sngi sa saw ngut kiwei pat ki la wan hi sha ki pulit ban ioh jingiarap na ki pulit bad mynta ki la don haduh 24 ngut kiba la ioh ban pyllait da ki pulit kynthup ia kitei ki saw ngut kiba la wan mih hi sha thanat
Ha kajuh ka por u SP ka West Jaintia Hills, u bah Lakador Syiem u la iathuh ba la thung ia ka kynhun ba kyrpang ban tohkit halor katei ka kam khayi kynthei bad ruh ia ki kam die met ha ka District
“Ngi la thung ia ka Special Investigation team ban tohkit bniah bad ia kane yn khlieh da u Dy. SP (Hq) u bah Macjoel Marngar nalot ar ngut ki DSP ha ryngkat u OC cum Circle Inspector bad ka OC Women Police”, la ong u bah Syiem.
Katba u Addl. SP ha ryngkat u SP kin long ki nongiarap ia katei ka kynhun tohkit.
Na ka liang utei u heh pulit ka EJH u la ong ba kitei ki kynthei kiba la ioh ban pyllait ki donkam ia ka jingiasyllok ka sneng ka khraw bad ngi la shaniah ia kane ha ka tnad social welfare.