Shillong, 06 Nailur:
Ka BJP na Delhi ka la thung ia u myntri ka tnad sorkar pdeng ba peit ia ka tourism u Alphons Kannan Thanam, ba un peit ia ka kam elekshon ka party ha kane ka jylla Meghalaya.
U Thanam u dei u myntri ha kane ka sorkar u Narendra Modi uba long ruh u Khristan na jylla Goa. Kane ka jingaiti ka party ha une u Khristan ka long shi bynta lehse ba ka party kan khring ia ki paidbah Khristan ha kane ka jylla khamtam ba kane ka party ka la ther bha ha ki paidbah ba ka dei kaba shit niam.
Haba pynlait khubor halor kane, u secretary ka BJP Meghalaya u Bah Bashailang Khongwir u la ong ba ka party ka la iakren ruh bad u president rangbah u Amit Shah ia ka jingpynkhreh ia ka elekshon ha kane ka jylla.
“Ka party ka la iakren ia ka jingpynkhreh bad pynbeit pali ia ka jingwan jngoh u President Amit Shah ha nongbah ha ka 28 tarik mynta u bnai”, la ong u Bah Khongwir.
Ha kajuh ka por, ki dkhot ka Core Committee ka BJP Meghalaya kynthup ia u President Bah Shibun Lyngdoh, Vice President u Edmund Sangma, u General Secretary Bah Bashailang Khongwir, u Treasurer u Sarwan Jhunjhunwala bad ka Executive Member ka Kong Bianca Kyndiah ki la iakynduh ia u Amit Shah, ba don lang u General Secretary u Ramlal, u Ram Madhav, u Himanta Biswa Sarma, Ajay Jamwal bad u Nalin Kohli.