Thung kynhun tohkit ka sorkar, ba shah shoh 12 ngut ha Tura

Shillong, 12 Jymmang:
Ka sorkar Meghala ya ka la thung ia ka kynhun tohkit ka High Level Inquiry Committee (HLIC) ban khlieh da u commissioner & secretary ka Social Welfare u MHK Marak ban tohkit halor ka jingshah pyn shitom ki 12 ngut ki kynthei ha Tura ha kiba kam sengbhalang halor ka jingkynnoh ba ki la leh ia ki kam awria.
Ka myntri ka tnad Social Welfare ka Debo rah Marak ka la iathuh ha ki nongthoh khubor mynta ka sngi ba ka HLIC kan aiti ia ka kaiphod hapoh 30 sngi ban sdang la

kumno kumno naduh kane ka sngi Hatmajai. “La kyrmen ba ia kane ka HLIC yn pyn bna noh ha kane ka janmiet sngi Nyngkong”, la ong ka Marak.
Ka Marak ka la iathuh ba kane komiti lada donkam kan nym sngap ia ka jingtohkit ba la thung da u DC ka West Garo hills.
Ka la ong ba ka sorkar ka kwah ban ioh ia ka daw tynrai jong katei ka jingjia bad ban wad ia ka jingshisha, halor ki kam ba leh da ki dkhot ki sengbhalang pyrshah ia kitei ki kynthei, ka jingtreikam u DC, ki pulit bad kiwei ha kaba iadei bad kane ka kam. Ka la ong ba kino kino kiba lap ba pynkhein ia ka ain, yn pynshitom beit.
Ka la ong ba ia mynta ym pat lah ban kdew kti mano ba donkti shisha ha kane ka kam hynrei yn sa tip hadien ba la dep ban pynlong ia ka jingtohkit.
Ka la ong ba ka komiti kan tohkit ruh ia ka jingai jaka sah u DC ka West Garo hills ia ka Jaynie Ningring N. Sangma bad kiwei kiba kynnoh donkti ban pynshitom ia kitei ki 12 ngut ki kynthei ha Tura Circuit House.