Thung ksiang ka UDP ia u Jemino ban khroh lang ia ka KHNAM

Shillong, 04 Naitung:
Ka jingialang ka Special Committee ka UDP kaba long mynta ka sngi, ka la rai ban iawer lang ia ka KHNAM kawei na ki seng riewlum ban iadon lang ha ka kynhun synrop ne alliance shwa ban leit sha ka elekshon ha kane ka jylla.
Ka party ka la bynshet ruh ia ka kam ksiang ha u General secretary ka UDP u Dr Jemino Mawthoh ban iakren bad ban ai jingthoh sha ka KHNAM halor kane kam kam.
Haba pyntip halor kane, u Dr Mawthoh u la ong ba ka UDP kam kwah ban long khim jingmut bad ka kwah ba baroh ki seng riewlum kiba don ha kane ka jylla kin don lang ha kajuh ka rynsan na ka bynta kajuh ka kam bad ka jingthmu ia ka jaitbynriew.
“Ka Special Committee ka la bynshet ia ka kam ha nga kum u general secretary ban phah kyrwoh sha ka KHNAM ba ka party ka kwah ba kan don lang ha kane ka rynsan jong ki seng riewlum”, la ong u Dr Mawthoh.
Hynrei na ka bynta ka People Deocratic Front (PDF) ym pat don ka jingiakren ia mynta namar ba ka long kaba dang thymmai.
U Dr Mawthoh u la ong ba kumba kwah ki paidbah ka thrang ba baroh ki seng riewlum kin iadon lang ha kajuh ka rynsan khnang ban pynkhlain ia ka bor jong ki seng riewlum namar ba lada iapait kan pynpharia iaki bad kaba myntoi bad ioh nong kin dei ki seng nabar.
Lah ban kdew ba ka UDP ka la iatreilang bad ka HSPDP ha Khasi bad Jaintia Hills bad ka Garo National Council (GNC) ha Garo Hills ha kane ka elekshon MLA ban wan.