Thung komiti ka UDP ba kyndang iing ha Umsawli

Shillong, 11 Naiwieng:
Ka UDP ka la thaw ia ka komiti ba kynthup lai ngut ki dkhot ban pule bniah ia ka jingshah kyndang ki iing briew ha Umsawli ha ki briew ka sorkar ha ka sngi Saitjain.
“Kane ka komiti kan lum ia ki kot ki sla bad ki jingtip ba donkam ia ka jingiakam mar kylliang ia ki jaka hapdeng ka sorkar bad ki briew basah ha katei ka jaka”, la ong u working president ka UDP u Bah Paul Lyngdoh mynta ka sngi Nyngkong.
U Bah Paul u la ong ba kin hap ban pynshisha namar ba ka MUDA ka la kam ba ki la ioh ia katei ka jaka da kaba siew lut ia ka pisa sha ki trai ba dei ia katei ka jaka.
U Bah Paul u la ong ba ki lai ngut ki dkhot ba ialam da u general secretary ka Shillong City UDP Bah Allantry F Dkhar kan aiti ia ka kaiphod hapoh lai sngi.
U la pynpaw ha kajuh ka por, ia ka jingsngewkhia ia ka jingshah kyndang ki briw ha ka sorkar kaba la ktah jur ia ki.