Thung ka NPP ïa u Bah Prestone, kum u President ka NPP Meghalaya

Shillong:Ka National People’s Party (NPP) ka la thung ïa u Bah Prestone Tynsong, kum u President ba thymmai ka NPP-Meghalaya hadien ka jingiehnoh kam u President barim Dr. WR Kharlukhi.

Katkum ka jingpynbna (Notification), u National President ka party bad Myntri Rangbah ka Jylla Conrad K Sangma ula thung ïa u Bah Prestone Tynsong kum u President ba thymmai ka NPP-Meghalaya katkum ka kyndon ba 7 (ii) jong ka National People’s Party (NPP).
U Conrad ula pyntip ruh ba da kane ka jingthung kum u State President, la pyllait noh ïa u Bah Prestone na ka jingbat kam ha ka National Committee.

Lah ban kdew ba u Bah Prestone u ba bat kum u Symbud Myntri Rangbah ka Jylla (DyCM), u dei ruh uba bat kum u National Vice President ka NPP.
Na ka liang u Bah Prestone ruh ula pdiang ïa kane ka jingthungkam bad ula shimti syndon ïa ka kam.
Ka NPP-Meghalaya ka la pynithuh ïa la u State President ba thymmai ha ka jingïalang ba long ha ka sngi Ba-ar, hapoh ka Ophis ka Party ha Shillong, Ha kane ka jingpynbna, la ïadonlang ruh u Myntri Rangbah ka Jylla Conrad K Sangma.

U MP ka Rajya Sabha Dr WR Kharlukhi ula iehnoh ïa ka kam State President ka NPP namar ka rta, ong ka khubor ba ïohlum.
Haba thoh hapoh ka X, u Myntri Rangbah ka Jylla ula pyntip ba u Bah Prestone ula shimti ïa ka shuki President, ka Meghalaya State Unit ka NPP na u Dr Kharlukhi.
Conrad ula kren ruh halor ki jingshakri jong u Dr Kharlukhi kum u President ka NPP.
“U Dr Kharlukhi ula shakri kum u President la 16 snem bad ka por jong u bad ka NPP kala kham slem kum u briew ba shaniah bad u paralok jong u Nongïalam jong ngi (L) Purno A Sangma. Ngi ai khublei ïa u halor kine ki slem ba ula aiti ha ka kam bad ka jingnoh synniang ka bym lah thew shuh sha ka NPP,” ula ong.

U Conrad ula kitbok ruh ïa u Bah Prestone haba pynpaw ïa ka jingshaniah skhem ha ka jinglong nongïalam jong u.
“U Bah Prestone da ka jingshemphang bala bun snem ha ka kam saiñ pyrthei ka Jylla, un shim ïa ka jingkitkhlieh na u Dr Kharlukhi bad nang pynsuhthied ïa ka NPP ha Meghalaya bad ha ka thaiñ Shatei Lam Mihngi. Ngi don ïa ka jingshaniah kaba skhem ha ka jinglong nongialam jong u bad ngi kitbok ruh ïa kaba bha tam,” ula bynrap.