Thung ka jing tohkit ba laitluid bad thad madan ia ki riew bam sap, ong ka KSU

Shillong: Ka Khasi Students’ Union (KSU) Central Executive Council hapoh ka jingialam u General Secretary U Samla Donald V.Thabah ryngkat U Vice-President Samla Biangbor L.Paliar lem bad kiwei kiwei ki dkhot CEC ha ka 14 tarik jong u bnai Jylliew, ka la leit ia kynduh hi Markhmat ia u General Manager ka Food Corporation Of India u P.N Singh ban wad jingtip kaba bniah halor ka jingioh kem ki pulit ka Jylla Assam ia u Khaw haduh 1 lak byrni ha kaba ia kitei ki khaw ka Sorkar India ka la mang kyrpang ban pynpoi sha ki Paidbah ka Jylla hi baroh kawei.

Ha ka kyrwoh, ba la pynmih da ka KSU, la iathuh ba ha kane ka jingiakynduh na ka liang jong u General Maranger jong ka FCI, u la ong ba um don jingtip ei ei ruh em halor kane ka jingia kynnoh bamsap ia u khaw, namar kum ka ophis kala dep phah ia une u khaw sha ka tnad Social Welfare bad kane ka shong eh ha ka tnad Social Welfare jong ka sorkar jylla.

U samla Donald V. Thabah General Secretary ka seng KSU u la ong ba kum ka seng ka don ka jingsngewkhia haba ka ioh i lyngba ki lad pathai khubor, ba ia u khaw kaba ka sorkar pdeng ka la mang ia ki paidbah ka jylla Meghalaya lyngba ka National Food Security Act 2013 un poi biang sha ka Jylla Assam,u la ong shuh shuh ba kane ka jingleh buit tuh jongno re jongno ka long kaba ym lah ban pdiang ha kaba ki briew hapoh ka Jylla kiba dei hok ban ioh ia u Khaw yn pyndonkam bakla noh da mano re mano tang ban ia biang ka malade Shimet.

“Ngi pynpaw ruh ia ka jingsngew artatien ruh ha kaba ka statement u General Maneger, Dy.CM bad Social Welfare Minister ka ia pher uwei halor u wei pat. Ka jingiapher ha ka jingai jingtip ha kaba ia dei bad kane ka kam namar u symbut myntri rangbah u la ong ba um don jingtip ei ei, katba u Social Welfare Minister u kynnoh kylla ia ki nongshallan ia u khaw” ong ka kyrwoh.

Khadduh khatwai ka KSU ka dawa ba ka sorkar Jylla ba ka dei ban thung ia ka kynhun tohkit ba kyrkieh kaba ym ia shah liang bad kaba stet khnang ban lap ia ki briew ba donkti ban pynshitom bad thad madan shi syndon ia baroh kito kiba don kti ha kane ka tuh, lada ka sorar kam leh ei ei ne leh bym patiaw ka Seng kan shim da ka sien jam kaba tyngeh.

“Ban pynduh ia kane kam bamsap kam dei na ngi ki paidbah hynrei dei kito kiba shong ha secretariat hynrei lada kita kiba shong ha ka bor kim shim khia ka Seng ryngkat bad u paidbah, kan sa leh hi ia kaba donkam lada ka dei ban iaid da kano kano ka dur ruh”, pynkut ka kyrwoh na une u samla nongialam ka KSU