Thung ka HNLC, ia U bah Sadon ban iakren bad ki ksiang ka sorkar

Shillong: Ka HNLC, ka pyntip mynta ka sngi, ba ka la thung ia U bah Sadon K Blah, President HNYF, ba un iakren bad U bah Bah Peter.S.Dkhar (Retd IAS) bad kumjuh ia U AK Mishra, Advisor MHA Northeast (Retd IPS), ban pyniaid shakhmat ia ka jingiakren iasuk bad ka sorkar.

Ka seng HNLC, lyngba U bah Sainkupar Nongtraw, General Secretary cum Publicity Secretary, ha ka jingpynmih khubor, u shim ba kitei ki ksiang, kin iatrei lang ryngkat, na ka bynta ban ioh ia ka jingsuk bad ka jingioh ia ka jing iadei kaba skhem, lyngba ki bor ba la pynkhamti ha ki. Ka HNLC, ka ai khublei ruh ia ka KJCLF( Khasi Jaintia Church Leaders Forum), da kaba ki pynpaw ia ka jingthrang jongki, ban poi sha ka jingiakren iasuk bad ka HNLC, ka khmih lynti ban wan rah ia ka mariang kaba sngew shngain ban iaid shakhmat ia ka jingiakren iasuk.