Thung dieng ka MCL, 9000 tynrai da ka stad Japan

Jowai, 9 Naitung:
Ka Meghalaya Cement Limited kaba ju tip bha kum ka Topcem Cement kaba don ha Thangskai East Jaintia Hills, mynta ka sngi ka la pynlong ia ka jingthung dieng kaba haduh 9000 tynrai ha ki jaka bym don dieng hapoh ki jaka jong katei ka kharkhana dewbilat.
Mynta ka sngi ia kitei ki 9000 tynrai la thung ha ka jaka kaba heh haduh 2500 square metres. Kitei ki jaitdieng ki kynthup haduh 23 tylli ki dieng kiba lah ban mih ha katei ka jaka katkum ba la dep jurip bniah da u stad jong U Senior Engineer ka Central Polution Control Board, u Dr. Shantanu Kumar Gupta.
Da ki spah ngut ki nongtrei kynthup ia ki officer bad ruh ka kynhun kynthei Ladies Club bad ki khynnah skul ki la iashim bynta ha katei ka jingthung dieng.
Ka jingthung dieng la bud katkum ka Akira Miyawaki Method of Environment Forest Plantation hapoh ka jingialam u Dr. Dutta ha ka jingiadonlang ruh u President ka Company u RK Pareek bad u Resident Director u SK Rai.
“Ngin pyrshang katba lah ban wanrah ia ka thong jong ka MCL katkum ka Slogan jong ka ban pynjyrngam ia ka ri India bad ia kane ka thain Narpuh, la ong u President ka Company.
“Ngi don ruh ka jingthmu bad iarap ia ki shnong ba marjan lada ki don ka jingmut ban thung dieng katkum katei ka jingstad Akira Miyawaki kaba dei ka jingstad thung dieng ki nong Japan”, u Pareek u la bynrap.