Thung 150 tynrai dieng ha Laitmynrieng

Shillong 16 Jymmang:
Ban iada ia ka mariang bad ban pynneh ia ka um, u rangbah Croningstar Khongtani na shnong Laitmynrieng u la shim ia ka jingmut ba shynrang da kaba thung dieng hi marwei hajan kawei ka tyllong um kaba don ha katei ka shnong ha ka surok bah Shillong-Pynursla-Dawki.
U Bah Croningstar u la thung marwei 150 tylli ki tynrai dieng hajan kane ka tyllong um kaba ki paidbah katei ka shnong ki ju pyndonkam ban pynneh ia ka um namar ba ha ka jingiaid ka por, ka lah ban jah noh na ki jinglalot spah jong ki briew ban pynjot ia ka mariang.
“Ka jingthmu jong ka jingthung dieng ka long ban iada ia ka mariang bad ban pynneh ia ka um bad kyntu ia ki paidbah ba kin sumar ban kheinkor ban nym pynjot pathar ia ki khlaw namar ba lada jah ki khlaw, ka um kan sa jah”, la ong u Bah Croningstar.
U Bah Croning u la ong ba u la kyrpad ia u myntri PWD ba nym pynmih hukum ba ka PWD kan nym pynjot ia kane ka tyllong um kaba don ha synjah ka surok bah bad u la kyntu ia ka tnad Soil & Water Conservation ba kan pynshna kynroh ban ker ia kane ka tyllong um khnang ban iada ia ka na kano kano ka jingjot.