Thok ka ATM, ioh pisa tang shiteng na kaba pan

Shillong, 7 Nailur:
Hynnin ka janmiet sngi Saitjain ki paidbah kiba sei pisa ki la lyngngoh ngain hadien ba ka ATM kam shym la ai pisa kat kum ba ki paidbah nong sei pisa ki donkam. Kumba shiphew ngut eiei ki nongsei pisa na katei ka ATM ba don ha Mission Compound Shillong ki la kyndit haba katei ka ATM ka shym pynmih ia ka pisa baroh kaba ki la pan hynrei kala pymih tang mar shiteng ia ka pisa.
Iwei I kong iba sei pisa na katei ka ATM hynnin ka sngi I la iathuh ba i mut sei pisa T.2 hajar hynrei ka ATM pat ka pynmih tang T.1 hajar katba ha ka slip ba sei la thoh beit T.2 hajar. Don pat kiba sei T.8 hajar ka ai tang T.4 hajar. Hynrei kaba lyngngoh ka long ba lada sei T.500 ka pynmih lut ia ka pisa kaba ki pan katba kiba sei T.1 hajar shaneng ka ai tang mar shiteng.
Kane ka jingthok jong ka ATM ka la pynlyngngoh ia kiba bun ki nongsei pisa. Hadien ba la lap ia kane kitei ki nongsei pisa ki la phun wut wut sha ki nongtrei jong ka State Bank of India (SBI) ban pyntip ia katei ka jingjia.
Ki nongtrei jong ka ATM kiba la wan poi ha katei ka jaka ki la lap shisha ba ka don kum katei ka jingjia bad ka daw kadei namar ba ka don ka jingthut ha ka mashin.
Na ka liang ki nongtrei ka SBI ATM ki la ai jingmut ia kitei ki briew kkiba la kynduh ha kane ka jingjia ba kin thoh jingujor sha ka SBI khnang ba ka pisa ka jong ki kan nym jah na katei ka Account.