Thoh u MDC Mawlai sha u CS

Shillong,19 Nailur:
Ha ka 22 tarik u Nailar ki nongshong shnong jong ar tylli ki shnong kiba hap hapoh ka Mawlai, ka Mawiong Umjapung bad ka Maw iong Rim ki la ioh ia ka jingthoh na ka tnad MeECL lyngba ka Meg halaya Power Distribution Corporation Limited, kaba la thoh da u Assistant Executive Engineer, Revenue Sub Division II, MePDC, B.C house Shillong, bad ha katei ka jingthoh la batai ba katkum ki kyndon ka CEA Regulation bad ka Meghalaya Elect Supply Code 2012 Regulation 7.2 baroh ki meter ki dei ban long da u Static Meter, hynrei u meter ha ki ki longing jong ki ar shnong u dei u Electro Magnetic Meter, bad ka tnad ka la pyntip ba donkam ban bujli noh kyrkieh ia u, ha ka jingthoh ka tnad Me ECL ka la kyrpad ia ki longing ba ki dei ban thied noh da u Static Energy Meter katkum ka kapasity bad ban wan rah sha ka ophis jong u AEE hapoh ka 10 sngi ba la ioh pdiang ia ka jingthoh.
Ha katei ka jing thoh la thoh “Lada phim lah ban thied/bujli ia u meter kumba la kdew haneng, ngi na ka liang jong ka ophis MEPDC, ngim banse ban bujli hi ia u meter jong phi, katkum ka kyndon CEA (Installation & operation of Meters), 2006”’. Halor katei ka jingthoh u bah Process T Sawkmie , MDC ka Mawlai u la thoh da ka jingthoh sha u Chief Secretary ka jylla u bah Barkos Warjri ban pyntip sha u ba katei ka jingthoh kaba la phah da ka tnad MePDC sha ki paidbah ka dei ka jingthoh kaba la khor eh, bad u la ong ba katei kam dei ka rukom ban pyntip sha ki paidbah da ki ktien khor, kaba pyni ba ka tnad ka la khein poh ia ki paidbah.
U la thoh ruh sha u CS ba ia mynta ka shem jingeh ia ki paidbah ban kylliang lane bujli noh ia u meter barim sha uba thymmai, namarba u meter ba ki pyndonkam mynta u dang treikam bha, u la thoh ruh sha u CS ba ka tnad ka dei ban ailad ia u paidbah ban bujli pat ia u meter haduh ba u meter barim un da sniew. Ha katei ka jingthoh u bah Sawkmie u la suhlang ruh ia ka jingthoh kaba ki ar Dorbar Shnong ki la aiti sha u kaba pyni ba kim pdiang ia katei ka hukum ka tnad MePDC ban bujli noh ia u meter barim sha u ba thymmai, ha ryngkat ki daw kiba ki la pyni ba u meter ba rim u dei uba la dep Test, bad pynthikna bad la wan teh da ki briew jong ka tnad MeECL bad haduh mynta u dang treikam, ryngkat kiwe pat ki daw. Haba la wad jingtip na ki katto katne tylli ki longing halor katei ka jingjia ki la iathuh ba ka tnad MePDC ka la buh dor T.900 tyngka ia ki ban bujli ia utei u meter rim sha u meter ba thymmai, bad ki la pynpaw ba kim kwah ban bujli tad haduh ba u meter ba la rim un ym treikam shuh.