Shillong, 14 Rymphang:
Ka jing pynngat ha ka sekshon 307 IPC, ia U bah Jeskalur L Mawdoh, lane ba u mut ban pyniap ia u myntri rangbah ka Jylla, namar ba u leit pyndei da ka kali Max jongu, ha ka Sngi Palei ba ladep, ha 3mer, ka la pynmih ia shibun bah ki jingkynthoh ba har rukom, ha ka peij facebook, ha kine ki sngi.
U bah Rit Rynjah, u ong “Kane ka dei ka jingshah thombor im im peit peit pyllein pyllein haba shit haba shai hakhmat u ba bun ba lang bad ka kylla long ka tamasa bah ia uba peit bad ka saja kaba shyrkhei ia uba ngat. Mano u Khun dap bnai dap sngi dap shynrang uba kloi ban ieng pyrshah ia kane?
U Bah Aiban Rynshon, u ong “Katno ngut na ki MLA MDC seng riewlum ki ban iarap lang ia une u bapli u bah mawdoh. La ong biang sa U Bah Ban J Rymbai, ba ha u snem ba ladep, ka kali jong U Mukul, ka leit tynrah briew ha Bhoi, te haba kumta u kylli, la ki la pynngat kyndon eiei ne em ia u.
U Bah Kyrsoibor Pyrtuh, u ong ha ka jingthoh da ka phareng “Ka aksiden, dei ka aksiden bad ki don ki ain, kiba dei ban tian bishar, na bynta katei ka jingleh jongu”.
Ki don shibun bah ki jingkren bad ki jingkynthoh ha ka peij U Rang ieid Ri – Adelbert Nongrum, halor katei ka jing tyngkhuh kali, ha kaba la shon ruh ia ka dur jong katei ka max, kaba leit syllud ia ka kali jong u myntri rangbah.
Ha kawei pat ka khubor, na ka liang jong ka Jaintia National Council (JNC) ka la kynnoh ba ka Tarajur jong ka ain ha ka jylla ka theh bad noh shiliang hapdeng ki heh ki hain bad ki rit ki ria.
Halor ka jingshah pynngat u bah JL Mawdoh driver Tata Sumo kaba la tynrah ia ka kali u Myntri Rangbah ka jylla hapoh ka kyndon ain thmu pyniap briew, na ka liang ka Jaintia National Council (JNC) kala mih shakhmat ban pynrem jur ia katei ka rukom noh shiliang jong ka ain ia kiba rit ba ria bad iap noh hakhmat ki heh ki Hain.
“Balei ka tnat pulit ne ki bor kiba bat ia ka ain kim leh eiei ia kito ki pulit kiba donkti ban bom ban tied ia ki khynnah pule Kiang Nangbah Govt College khamtam ia kiba haka Uniform?, la ong ka JNC. “Ka kam Accident kalong kaei kaei kaba ngim lah ban lait, hooid ngim lah ban len ba kadon ka ain ia ki kam Accident hynrei ban pynngat haka ain thmu pyniap kalong kaei kaei kabym lah ban pdiang”, ka bynrap u kyrwoh na katei ka seng.
Katei ka seng ka la buh jingkylli ruh ia ka tnad pulit ne ki bor ka ain balei ba kim leh eiei ia u ma MB Rymbai CEM barim ka JHADC halor ka jing donkti jong u ban bamklop iaka pisa paitbah kaba la palat 2 klur tyngka ha kine ki khyndiat snem kiba lah leit.
Ka JNC ka pynpaw iaka jing sngewlyngngoh kaba khraw halor ka jing pynshlem jong ka sorkar jylla ban pynpaw paitbah iaka kaiphot tohkit halor ka jingjia ha Mookhep,haka jingshisha kibor ka ain kilah dei ban pyngngat kyndon ain pyniap briew ia kito kiba donkti ban siatiap iaki 2ngut ki mynsien ba kordor ha Mookhep la ong u Sambormi Lyngdoh u Chairman ka JNC
“Lada ka Ain kalong salonshar ia baroh,ngi kyntu iaka tnat pulit ban weng noh ia katei ka kyndon kaba kila pynngat ia u bah J.L Mawdoh bad ban pynlong iaka jing tohkit kaba bniah ban lap iaka jingshisha”, la ong ka JNC.
Phi don ban ong eiei?