Thoh ka Seng Samla Shella ban iarap ka Lafarge

Shillong: Ka Seng Samla Shella (SSS) mynta ka sngi ka la thoh sha u director ka Lafarge Umiam Mining Pvt. Ltd kum shi bynta ban pan jing iarap sha ki nongtrei jong ka thain Shella.

Lyngba ka shithi ba la soi da u Manbhabok Swet u ba dei u general secretary bad u Kitboklang Shongwan u president, ka SSS ka la pynkynmaw ia ka Lafarge Umiam Mining Pvt. Ltd halor ka jing eh ki paidbah bad ki nongtrei jong ka kompany na ka thain hadien ba ka sorkar India ka la phah khang shnong lane ka ‘lock down’ ha baroh ka ri India.

Na ka liang ka SSS ka la kyntu ia ka Lafarge Umiam Mining Pvt. Ltd ban sam marbam bad ki tiar iada na ka jing pang ‘Corona Virus’ sha ki paidbah ka thain bad ban pynbiang ki doctors bad kiwei pat ki nong sumar sha ka thain.
Nalor ki marbam ka seng ka la kyntu ruh ia ka kompany ban pynlong jing hikai sha ki paidbah halor ka jing pang ‘Corona Virus’ katkum ki kyndon ka sorkar.
Khatduh katwai ka SSS ka la kyntu ia ka Lafarge Umiam Mining Pvt. Ltd ba kam dei ban weng ne set ia ka tulop ki nongtrei ka kompany ha kum kane ka por ba pakhang shnong habaroh ka ri India.