Shillong: Ka KSU ka la thoh sha ka Director jong ka tnad Arts and Culture ban pynpaw ka ingbym sngew iahap ia ka tamasa dro dur ha ka jylla ne ka Shillong Sreet Arts Festival (SSAF) kaba la dro da ki dur jong ki aktor actress ne da ka dur u Mithun Chakravorty bad kiwei pat. Ka KSU ka la ong ba ka iaroh ia ka jingpynlong ia katei ka tamsa da ka jingthmu ban sei ia ki riew donsap jong ka jylla hynrei ka la ong ba ka dei ruh pat ban sei ia ki jinglong tynrai jong ka jylla lyngba katei ka tamasa dro. Ka KSU ka la kyntu ia ka Director ba kan hukum ia ki nongpyniaid jong katei ka tamasa ba ki dei ban pynrung ia ki jinglong tynrai jong ka jylla ha katei ka tamasa dro.