Thoh ka BJP sha U Amit Shah halor ka CAB

Shillong: U Bah Bashailang Khongwir uba dei u State General Secretary BJP Meghalaya Pradesh u la phah ka shithi sha u Shri Amit Shah ha kaba ia dei bad ka jingsngew jong ki paidbah halor ka jingpyntreikam ia ka CAB hapoh ka jylla Meghalaya.

Ka jingtyrwa ban buh ia ka CAB hapoh ka jylla Meghalaya katba ban pyllait pat ia kiwei ki jylla kum ka Mizoram, Nagaland bad Arunachal Pradesh tang na ka daw ka jingdon ia ka Inner Line Permit hapoh kine ki jylla, kam long kaba pdiang sngewbha kum ka party kaba don hapoh jylla Meghalaya kaba pyni shai ia ka jingphiah ia ki riewlum rit paid kiba hapoh ka thain North East.

Ki riew kum jong ka jylla Meghalaya kim long pher ei ei na kiwei pat ki riewlum jong kiwei ki jylla kum ka Mizoram, Nagaland bad Arunachal Pradesh ha kaba iadei bad ka ioh ka kot, ka roi ka par bad kiwei kiwei, kaba pyni shai ba kine baroh ki don ia kajuh ka rukom im bad kajuh ka rukom kiew ha ka ioh ka kot.

Haba ngi phai pat sha kawei ka liang ki riewlum jong ka jylla Meghalaya kum kiwei pat kumba la kdew haneng ki dei ban ioh ia kajuh ka jingiada. Da kaba pyniaryngkat lang ia ka Meghalaya bad kiwei pat ki nongbah baheh bad ba la kiew ha ki liang baroh ha kaba ka CAB ka long kaba paka ban shakri ia ka jaitbynriew ha kum kine ki jylla, kam long kaba bit ia ka Party BJP hapoh kane ka jylla ban iuh roit ia ki hok bad ban long ki maw jynthut ia ka roi ka par ia ki riewlum jong kane ka thain bad ngi pynpaw ba ngi don ka jingsngewlem na ka b ynta ki jaidbynriew ha kane ka jylla.
Ha kane ka shithi u General secretary u pynpaw ruh ba u don ka jingkmen kaba khraw kum ka party ka iohi ia ka lawei kaba phyrnai ia ka jylla Meghalaya bad ia ka thain North East hi baroh kawei ha kaba ka Party kan pynkylla na ka ‘Look East Policy’ sha ka ‘Act East policy’ kaba nang iaid shaid shaid ban pntreikam ia ka. Kum ka party ngi pynpaw ba ngin ym ieh da lei lei ia ki nongshong shnong jong kane ka thain kaba la ai ka jingkyrshan ia ka sorkar NDA.
U pynpaw shuh shuh ba hapoh ka jingialam jong ka sorkar pdeng kane ka sorkar kan burom bad bat skhem ia ki riti ki dustur uba rim jong ki paid ka Meghalaya kaba la buh ka jingshaniah kaba pura ha ka ri hi baroh kawei. Bad mynta hapoh ka jingialam jong u Myntri Rangbahduh ka ri u Narendra Modi ngi kyrmen ba kane ka party kan pyrta jam na ka bynta ka hok jong ka Meghalaya.