Shillong 14 Nohprah: U bnai Nohprah udei u bnai uba ki paid khristan jong ka jylla bad jong ka pyrthei hi baroh kawei ban ap ia ka jingwan longbriew u khun u Blei u Jisu khris hangne ha sla pyrthei.
Ki khun khristan ki ju bunkam ha kiba kum kane ka por ban pyndap pynbiang ia ki jingdonkam hashwa ban poi ka ne ka sngi, ha kaba man la ka snem la ju sakhi, ba ha une u bnai ka iew ka hat kalong ka ba thnem bad heh iew bha la kalong ka iew die marbam mardih, lane ka iew dih jaiñ die nep bad mynta u snem ruh la sakhi ba kaiew ka hat ka thnem bha bad shngain.
Ki paidbah ki la ia tuid ban thied jingthied khamtam ha khyndai lad bad motphran, ban pynitynnad ha kaba iadei bad ma riam ka beit, ha ki iing kisem, ki jingai sngewbha bad kumjuh ruh ki jingbam ki ba bunjait, kum shibynta ban rakhe ia ka sngi khrismas.
U bnai Nohprah udei u snem una ka iew ka hat ka iaos bad thnem bha namar ki paidbah ki ju ja leit iew leit hat ban pynkhreh ia ka jinglehkmen khrismas bad ia ka snem thymmai, ha kaba lajan man ka sngi ka jingiathynian ki paidbah ha kiiew ki hat.
Ha ka jingleit ban jurip mynta ka sngi saitjain ka 14 tarik Nohprah 2024, la sakhi, ba ka iew ha khyndai lad ka badei ka iew ba heh ha Nongbah shillong, la iohi ba ka jingiabeh ki paidbah ban leit thied ia ki jingdonkam jongphi, kynthup ki lait ban pynpur ha ki iing kisem bad kiwei kiwei de ki mar ki mata ki ba ju pyndonkam hakhmat eh nakabynta ban rakhe ia ka sngi khrismas.
Nalor ki riewngeit khristan ki ba bunkam ban thied ia ki jingdonkam ha iewduh, police bazar bad kiwei kiwei de ki bynta ha sor Shillong, la sakhi, ba wat ki briew ba na kiwei kiwei de ki niam ki la wan ban thied jingthied lang namar ba kadei ka iew ka ba shngain bad biangdor.
Kumba ju leh mynshem snem ban pynbha briew ia ka iew khyndai, motphran, ban wah da ki lait bapur ha jrong jongki siej ba la shna bha kyrpang, mynta usnem ruh, la iohi ba ha khyndai lad ki nongtrei bylla ki ba dangia trei ban pynbha dur pynbha dar ia ka iew, da kaba teh ia ki siej ban wah ia ki lait bapur khnang ba ka iew ha kapor mynmiet kan long ka ba phuh bad phieng, nalor ka khyndai la iohi, ba ha Laitumkhrah ruh ladep ban pynthaba lut da ki lait bad ha kiwei kiwei de ki bynta ka sor, Shillong.
Phi don ban ong eiei?