New Delhi, 11 Jylliew:
Ki bor sorkar ki la ioh jingtip ba ka kynhun lehnoh ka NSCN(K) ka don jingthmu ban wan kiew sha India ban kput kylla ia ka jingshah pyniap ki dkhot jong ka ha ki kynhun shipai, kumta ki bor sorkar ki la husiar bha hadien ba ki la ioh jingtip na ki bor syntiat jong ki ba ka NSCN(K) kan wan kiew na Myanmar hapoh u pud u sam ka India ban kput kylla ia ka jingshah pyniap ki dkhot jong ka. “La ioh jingtip ba ki don kumba 15-20 ngut ki dkhot ka NSCN kiba la wan tur sha India na Myanmar, ki dei ki kheinduh ki ban wan kput kylla, ngi la long kiba la khreh ban iada” ong ka tyllong khubor na ki ophisar sorkar.
Mynta ka sngi U Rajnath Singh , myntri pohing ka sorkar pdeng u la lum ia ka jingialang ban pyrkhat na bynta katei ka kam, ha kaba ha katei ka jingialang la wan ban ia shim bynta da u myntri iada ri ka India, ki bor pahara ri bad ki heh shipai. Ha katei ka jingialang la ong ba la ia kren ba dang donkam ban hiar thma biang ha ki ktem lehnoh kumba leh ha kine ki sngi ban pynduh jait duh khong syndon ia ki. “Ki lehnoh ki lah ban hiar thma ia kino kino ki mar sorkar ne ia ki riew paidbah, ka jingpynbthei bom ha khappud ka Moreh mynhynin ka sngi ka lah ban dei ka kput ba nyngkong ki lehnoh” iathuh ki tyllong khubor na ki bor sorkar.
Ha kawei pat ka khubor, la iathuh ba u nongialam ba ha khliehduh ka NSCN(K) u SS Khaplang, uba la ngeit ba u dei uba la ialam ia ka katei ka seng ban siat ia ia ki shipai India ha ka 4 tarik u jylliew, la ong ba u don hapdeng ka jingpang bad la pynkit ia u sha kawei ak Hospital ha Yangon.
U Khaplang, ba la 75 snem la ong ba u la shitom na ki jingpang kiba la neh slem ha ka met jong u bad la ong ba la pynkynriah noh ia u na Tago kaba don ha khappud ka China bad Myanmar sha sorbah jong ka Myanmar ka Yangon saw bnai mynshuwa, iathuh ki tyllong khubor. Ka Myanmar ka la pyntip sha ka India shaphang ka jingkynriah u Khaplang uba dei u nong Myanmar sha Yangon ha u rymphang, 2015. Ka India ka ngeit skhem ba u Khaplang u don ha Yangon bad u dang shah sumar.
U Khaplang u dei u Hemi Naga na Myanmar, la kha ia u ha u iaiong, 1940 ha ka shnong Waktham, kaba don shaphang mihngi ka Myanmar’s Pangsau Pass, kaba hap ban iaid lyngba 1763 kilomitar ka jingjngai na Stilwell Road sha Ledo, Assam bad sha Kunming, china.
Phi don ban ong eiei?