Shillong:Ka seng Khasi Students’ Union North Khasi Hills District Unit, ka pyrshah jur ia ka ka jinglong kloi ki nongiasylla,ki myndie ri kiba khwan myntoi shimet bad ki rhah sbai halor ka jingiaid shakhmat jong ki trai jaka bad ki dalal ban die ia ki jaka ha Umsen kaba sha ki shipai BSF, na ka bynta ban shna ia ki ktem shipai, da ki spah akar la ia sylla sop sop,ka tei ka jaka ka dei kaba don ha ki thain khappud bad ka jylla Assam.
Ka KSU NKHD Unit kan ïai pyrshah ia ka jingiasylla kino kito ki langiong namar ka la iohi shai kdar la ki jong ki khmat ha kaba bun ki jaka ha sor la shu klun jubor bad shah thombor ki shnong khasi kiba don marjan,nalor ka jingshah khang lynti don ruh ki bynta ha kaba ka bor shnong ka hap tyngkhuh ia ki bor shipai kumba la sakhi ia ki shnong kum ha shnong Lawsohtun, Mawpat, Mawshubuit, ka Them Basuk bad ka Laitkor kiba ba dei ki shnong ba don marjan bad ki ktem shipai. Ha Mawlai man ka por ha CRPF camp ha kaba ka ju mih ka jingshah bom shah tied ki samla na kawei ka por sha kawei pat, ka jingknieh jaka ban shna ia ki gate shipai ha shnong Pyllun, Umiam, lada ym sngewthuh kloi kine kin sa long kylla ki jingshah kyrtoh hadien habud.
“Ngi la iohi shai ha kaba bun ki bynta ka sor bad khapsor ki la don ki ktem shipai kum jong ka Assam Riffles, Air Forces, BSF, CRPF, Gorkha TC bad kiwei kiwei.Nuksa na ki shnong ba don ki ktem shipai ka long ka jingdon ki shipai ha jan kim wanrah jingmyntoi ei ei ruh em hynrei ka wan rah ban ka jingduhnong ia ki jaka ki puta bad ka jingshah ktah ki jaka rep jaka riang, lada ngi pyrkhat ia ki jaka lehkai, ki hospital bad ki skul ka jingmyntoi bunsien hi ka leit sha ki khun shipai bad ki khun heh spah” ong shuh ka kyrwoh.
Ka jingthmu ban die ia ki jaka ha ki thain umsen ka wanrah ka jingartatien ia ka sorkar jylla, ka Hima bad ia ka District Council namar ka jingpynstet jong ki ban die noh ia ki jaka hapdeng ba ki paidbah ka jylla ki dang sah umdum halor ka kam pynbeit pud pynbeit sam hynrei ka jingdonkti jong ki ban die ia ka jaka sha ki Shipai ka pyni ia ka jingartatien shi katdei eh ia u paidbah ka jylla.
“Ki Nongmihkhmat ki dei ban pyrkhat bad kylla ka jingmut jingpyrkhat wat kwah ban pynlong Jammu and Kashmir bad Nagaland ia ka jylla Meghalaya namar kitei ki jylla ki mad ia bun ki jingia umsnam namar ka jinglehmeng ki shipai, namar haba ngi iaid na ka surok na shillong sha mylliem ha ki kynroh shipai 7mer phin iohi ia ki kyntien (TRESPASSERS WILL BE SHOOT lane TRESPASSERS YN SIAT”), ki tei ki kyntien ba pynpar niangkhriat bad lada bakla lei yn poi sha ka jingia iam briew, ka dei ba ngin ioh jinghikai lada ha sor shillong ki nud ban byrngem pyllein pyllein kaei ban jia ha ki thain ba kham pajih na ka nongbah” ong ka kyrwoh.
Ki shipai BSF ki dei ki nongiada khappud kumno u kwah ban buh ktem hajan khappud Assam u dei ban iada na ki nongshun bar ri ym ba un shong ha khappud Jylla kaba dang don hapdeng ka jingshongsuk shong shngain, ka dei ia ki ban pynleit jingmut sha thain khappud namar ka jingjyllei ki mynder ri Bangladeshi ban rungtuh bad wat ki dohiong runar ruh ki la shim kabu ban pynlong jaka rungtuh jaka mihtuh namar ka jingbymshimkhia jong ki shipai khappud.
Ka seng KSU NKHD Unit lyngba kane ka kyrwoh ka pynpaw shai kdar ba kan bteng ban iai pyrshah ia ki jingthmu jong ki nongiasylla, ki dalal, ki hima kumta ter ter ia ka jingthmu sop sop ban pynkloi ia ki kot ki sla ban die noh ia ka jaka sha ki shipai BSF.
“Ki syiem,ka District council ki dei ban khylliap noh ia ka bui jong ka jingdie jaka sha ki shipai BSF wat pyrshang ban ai NOC namar u paidbah u tip ba phi dei ka stieh ka jaidbynriew ban iada ia ka khyndew ka shyiap lada phi tang shu bakla bad lilam ki paidbah ka jylla kin sa ioh ka jubab lyngba ka kam jong phi bad ka KSU kan sa ai da ka jubab kaba tyngeh” pynkut ka kyrwoh lyngba U Samla James H Mawphniang, General Secretary, KSU, North Khasi Hills District Unit.
Ia kum kine ban shu sngap um myntoi..Dei ban leh da kaba tyngeh bad pynlong nuksa ia kiwei..Ka pisa hi ka dei kawei kaba kane ka jaidbynriew ka pynlong mraw iaka jaidbynriew..