Thmu ki MLA Congress ban pynlong MR, da U Ma Pala

Shillong, 22 Jymmang: Hadien ka jing shah rem kput ha ka elekshon shiteng samoi na Tura, ka Congress mynta ka la don hapdeng ka jingkyiuh thot thot ioh shah rat noh ha ka eriong ka BJP kaba syllad jan man ki jaka ha ri India.
Kat kum ka khu bor ba la iohlum, la don ki MLA ka Congress kiba la iakren napoh napoh ban wanrah da ka buit thym mai ban pynlong Myntri Rangbah noh ia u MP ka Shillong u Bah Vincent H Pala ha jaka jong u Myntri Rangbah ba mynta u Mukul Sangma.
Kumba ka paw, u Bah Pala u la dei uwei kiba pyni bor ia u Myntri Rangbah ka jylla khamtam hadien ba u la iaroh ia u Bah Pynshngain N Syiem uba la nud ban iakhun pyrshah ia u Mukul Sangma halor ka mat jong ka VAB, bad ka jingbym treh ban iehnoh kam MDC.
Namar ba ka jingiakren ka dang iaid napoh napoh, kane ka kam ban pynkhyllem noh ia u Mukul Sangma kam pat paw satia namar ba bun ki MLA ki sngewthuh ba ka long kaba eh ban pynkhyllem ia u Mukul Sangma namar ba u la bat bun ki MLA ha kti jongu.
Ka khubor ka la ong ba ki MLA ki la pyrshang ban leit tied biang ia ka jingkhang jong ka AICC kynthup ia ka President ka Sonia Gandhi bad u Rahul Gandhi ba kin plie lad ia ki ba kin pynkhyllem noh ia u Mukul Sangma.
Haduh katno kin lah ban pynkhyllem ia u Mukul Sangma, kan sa paw ha kine ki sngi ha kaba bun ki nongialam ka Congress, naduh u president ka MPCC u Bah DD Lapang un leit iakynduh ia ka Sonia sha Delhi ban iakren ia ka jinglong jingman ka sain hima sima ha kane ka jylla hadien ba la shah rem kput ha ka NPP.
Ka la don ruh ka jingdawa na ki MLA ka Congress ban khot noh ia ka jingialang ka CLP ban iakren ia ka jinglong jingman ka sorkar, ka jingshah rem elekshon nalor kiwei ki kam.
Haba twad jingmut na ka UDP, la kin kyrshan ne em ia ka Congress lada jia ba ka khot ban pynkhyllem ia u Mynri Rangbah ka jylla, ka khubor ka long ba kim kwah ban kyrshan ia ka Congress. Ka UDP kan nym kwah ban kyrshan ia ka Congress lada kin pynkhyllem ia u Myntri Rangbah u Mukul Sangma hynrei lada ki pynkhyllem, dei maki ban kyrshan ban thaw sokar ka UDP, la ong ka thymmei khubor na ka UDP. Ka khubor na ka UDP ka la ong ba kim kwah ban shah pynlong lang sait pap ban leit kyrshan ia ka Congress hynrei lada jia ban ialam ia ka sorkar, ki kloi ban shimti bad dei ki Congress ban wan kyrshan ia ki.