Shillong:U nongaiktien ka Meghalaya Pra desh Congress Committee, u Zenith Sangma, u la kynnoh ba ka sorkar Meghalaya Democratic Alliance, kaba la ialam da u Conrad K Sangma, ka la don jingthmu ban ai wai noh ia ki jaka jong ka MeECL sha ki riew shimet ban shna ia ki Mall, ki Hotel halor ka nongrim ban pynkiew ia ka tnad kam jngoh kai pyrhei ha ka jylla da ka ba pynlut ia ka pisa jong ki ki nongshong shnong.
Haba ia kren bad ki lad pathai khubor na ka liang u Zenith Sangma, u la kynnoh ba ka sorkar MDA ka don jingthmu ban ai wai ia ki jaka jong ka MeECL ki ba don ha Shillong, Umiam,Sumer Byrnihat Tura bad ha kiwei kiwei ban shna Mall, Hotel Casino ha ka kyrteng ban pynkiew ia ka kam jngohkai pyrthei kata ruh da ka jinglut da ka pisa u paidbah.
U Zenith u la kynnoh ruh ba kane ka jingthmu jong ka sorkar ban ai wai ia ki jaka ka MeECL ka long ban pynioh jingmyntoi ia ki katto katne ngut, ha kaba ynda u myntri rangbah un weng ia u James PK Sangma na ka tnad bording bad un ai noh da ka tnad kam jngohkai pyrthei.
U Zenith Sangma la kyntu ruh ia u Myntri rangbah ka jylla u Conrad K Sangma ba ym dei ban ia don bynta lang ha ka kam bamsap bad u dei ruh ban isynei ia ki nongshong shnong ha ka jylla.
U la kynnoh ruh ba ka sorkar MDA hapoh ka jingialam u Conrad K Sangma, u don jingthmu ban pyniaid ia ka sorkar ha ka rukom Corporate style, ha kaba tang shu iohi ba ka don ka jaka ka ba thylli ki la shu kwah beit ban shna ia ki mall bad ki hotel bad ia kine ki jingthmu, Congress kan ym lah ban pdiang da leilei ruh.
Phi don ban ong eiei?