Thmu ka sorkar BJP, ban wanrah da ka VAC

Shillong, 23 Iaiong:
Ka sorkar BJP ka la don ka jingthmu ban wanrah noh da ka Village Administrative Council (VAC) ha baroh ki jylla kiba don ka Autonomous District Council.
Katkum ka jingtip ba la ioh, ki nongialam ka BJP kynthup u Myntri khynnah ka tnad kam pohiing ba dei na kane ka thain Mihngi u Kiren Rijiju, ki don ka jingpyrkhat mynta ban pynkhreh ban wanrah noh da ka VAC kaban long kum ka met ha ki Dorbar shnong.
Kane ka VAC kan dei ka met kaba laitluid ha kaba ia ka jingbei pisa yn ai beit da ka sorkar khlem donkam ban iaid lyngba ka sorkar jylla ne ka District Council ba kin trei ia ki kam jong ki kaba syriem kum ka Panchayati Raj sha ri thor. Ka BJP ka kwah ban wanrah da kane ka VAC namar ba ka kwah ba ka roi ka par kan iaid sted bad kan poi beit sha ki shnong ha nongkyndong.
Katkum ka khubor thymmei,la iathuh ba u Myntri ka tnad kam pohiing u Rijiju u dang pynkhreh ban leit rah ia kane ha Parliament khnang ban pynlong kam ia kane ka jingthmu.