New Delhi: Ka Rabri Devi myntri rangbah barim ka Bihar, ka kynnoh ba ka sorkar BJP, ka thmu ban pyniap ia u tnga jongka, da kaba ai da ka bih.
“Ka sorkar BJP, ka kwah ban pyniap ia U Laluji ha hospital, da kaba ai ia u da ka bih” thoh ka Rabri Devi ha ka peij jongka ha ka twitter.
U Lalu Prasad, u don mynta ha ka jingshah kynnoh bamsap halor ka jingthied jingbam masi bad u don ha ka jingshah sumar ha Ranchi’s Rajendra Institute of Medical Sciences (RIMS).
“Ym shym la shah satia ban ia kynduh ia ki dkhot jong ka iing da ki bnai. Ka sorkar India, ka la bieit” ong ka Devi.
Ka Devi, ka iathuh ba U Tejashwi, um shym ioh lad satia ban ia kynduh ia la u jong u kpa, haba u leit ban ia kynduh ha ka step jong ka Sngi Saitjain.
“U Tejashwi ula leit ban ia kynduh ia U Lalu ji, hynrei ym shym la shah ban ia kynduh ia u. U paidlang ka Bihar bad ka Jharkhand, kin mih sha surok, lada jia eiei ia u. Lada ka sorkar Jylla bad ka sorkar India, ki kwah ban pyniap ia u, lada ki kwah ban pyniap ia baroh kawei ka iing jong u Lalu, ki lah ban lah ia kata, tangba kane ka jing synshar thombor kan nym trei kam satia” ong ka Devi.
“Ngam shym la ioh lad satia ban ia kynduh ia u kpa jongnga ha ka Sngi Saitjain ha RIMS. Nga la pyrshang ban iakren, hynrei U Superintendent, um shym la shim satia ia ka phone jongnga. Ngam tip ia ka daw, hynrei nga tip shai ba ki dkhot jong ka iing, ki lah ban ia kynduh lada U Superintendent of Police u kwah” ong U Tejashwi.
U Yadav, u kynnoh ruh ba ka sorkar Jylla, kam shah satia ia ki doktor jong ka RIMS, ba kin leh X Ray ia U Lalu Yadav.
Ha ka 10tarik mynta u bnai ka Supreme Court, ka la kyntait ia ka jingpan jamin jong U Lalu Prasad Yadav. U Yadav, ula don ha hospital, na ka bynta phra bnai kynthih bad ula pan jamin, na ka bynta ba un sumar ialade.
Phi don ban ong eiei?