Thmu ka sorkar ban ym shah tih shyiap pathar

Shillong, 23 Risaw:
Wat la ka jingtih shyiap pathar ka jur bha ha kane ka jylla, ka sorkar jylla kam pat kwah ban khang ia kane hynrei ka shu thmu ban thaw da ki kyndon ban ym shah ban shu tih pathar.
Haba kren sha ki nongthoh khubor hadien ba la wai ka jingialang ban bishar ia ka prokram ba 20 tylli ki mat jong ka sorkar pdeng, u Myntri Rangbah ka jylla u Mukul Sangma u la pynthikna ba ka jingtih shyiap ym lah ban khang kdam hynrei ka sorkar ka kwah ban thaw ia ki kyn don ban ym shah ban shu tih pathar.
U la ong ba ia ki tnad sorkar ba dei peit, la bthah ba kin leh ia kaba donkam halor kane kum ka jingleit peit ia ki jaka kiba long bad ki bym long ban tih shyiap.
U la ong ba ka donkam ban iatreilang bad ki briew kiba trei ha kane ka jait kam namar ba ki im ja na kane ka kam bad donkam ban thaw da kiwei ki lad lada pynsangeh ia ki kam jong ki.
Kane ka jingkren jong u Myntri Rangbah ka long kaba donkam bha ha kane ka por ha kaba ka jylla ka jur bha ka jingtih pathar ia u shyiap ha ka jylla kaba ktah ia ka umbam umdih bad ka jingkhuid jong ki wah.
Ha u Nailar ba la dep, ka National Green Tribunal ka la pynmih ia ka hukum ban mana pyrshah ia ka jingtih ia u shyiap khlem ioh bor na ka tnad sorkar kaba dei peit.